Nuk ka mbetur shumë deri te fillimi i pjesës së dytë të kampionatit basketbollistik kosovar, por drejtuesit e Federatës së Basketbollit të Kosovës janë në dilema, të cilat lypin zgjidhje shumë shpejt. Në fakt, janë disa klube të basketbollit të BKT Superligës, të cilat sikur nuk çajnë kokën as për klubet e tyre e të mos flasim për basketbollin tonë në përgjithësi.

Ndryshe nuk mund të kuptohet se si mund të vijë në pyetje vazhdimi i kampionatit vetëm për faktin se këto klube nuk janë në gjendje t’i kryejnë obligimet ndaj FBK-së, e cila dorën në zemër deri më tash është treguar “e butë”, por duket se çdo gjë ka kufirin e vet.

Nuk bëhet fjalë për shumë të madhe dhe kjo të jep të kuptosh se sa janë serioze klubet tona të basketbollit. Kjo mbase u ndodh vetëm kur bëhet fjalë për obligimet e tyre e jo kur janë në pyetje përforcimet me të huaj, pasi në raste të tilla nuk pyesin shumë për çmim vetëm për ta arritur qëllimin.

“Ne e kemi të qartë pozitën e klubeve dhe gjendjen e tyre të vështirë financiare. Mirëpo ne kemi bërë shumë lëshime dhe u kemi ndihmuar shumë klubeve të basketbollit, në çdo pikëpamje. Nuk ka ligë në botë në të cilën kuotizimi është vetëm 1000 euro dhe ku pagesa bëhet me dy këste, apo një ligë ku Federata e Basketbollit i paguan gjyqtarët. Kur kësaj i shtohet fakti se jemi ne ata që ua kemi falur 25.000 euro borxh klubeve, atëherë nuk e di se çka duhet të bëjmë ne më shumë për këto klubet”, thotë sekretari i përgjithshëm i BKT Superligës, Nazmi Paqarada, i cili shpreson se përkundër vështirësive do të gjendet rruga më e mirë në mënyrë që të mos pësojë basketbolli kosovar.

“Pres që të enjten të mblidhet Bordi i FBK-së dhe të gjejmë rrugën më të përshtatshme për të gjithë. Edhe pse 18 shkurti ishte afati i fundit për kryerjen e obligimeve, deri më tash këtë e kanë bërë vetëm Sigal Prishtina, Peja dhe Drita. Unë nuk mund të them se në rast se nuk kryhen obligimet kampionati nuk do të vazhdojë, pasi mund të gjendet ndonjë modus i pranueshëm për të dy palët, por jam i bindur se obligimet duhet të kryhen gjithsesi”, thekson Paqarada, duke përmendur edhe mundësinë që çdo lëshim, eventual të keqpërdoret nga klubet tona.

“Lëshimet janë pjesë përbërëse e shoqërisë sonë e cila pothuaj në çdo segment të jetës ka telashe dhe kjo është evidente edhe në basketbollin tonë, por që të gjithë duhet të jemi më të ndërgjegjshëm e në këtë rast drejtuesit e klubeve duhet të jenë më serioz në punën e tyre”, shprehet sekretari i përgjithshëm i BKT Superligës.