Basketboll. Duke u bazuar në numrin e përgjithshëm të titujve të fituar në të gjitha garat, Brazili është përfaqësuesja më e suksesshme në Amerikën Jugore.

Brazili e ka jetuar ëndrrën dy herë në kampionatin botëror duke fituar medaljen e artë në vitin 1959 dhe 1963.

Ndërsa nëse shikojmë më hollësisht historinë e kësaj përfaqësuese do të vërejmë se që nga viti 1954 deri në vitin 1970 Brazili në çdo pjesëmarrje në ndonjë garë ka dalë me një medalje të fituar.

Nëse do t’i kishim përmbledhur të gjitha trofetë që Brazili ka fituar në histori të basketbollit të saj atëherë do të shohim që brazilianët kanë fituar 2 medalje të arta në kampionatin botëror 2 të argjendta dhe 2 të bronzta.

Në lojërat Olimpike verore Brazili nuk ka arritur më shumë se vendin e tretë dhe medaljen e bronztë duke e përsëritur këtë tre here ndërsa më së shumti tituj të fituar ka në kampionatin e Amerikës Jugore gjithsej 4 medalje të arta 2 të argjendta dhe 4 të bronzta.

Gjithsesi për Brazilin medalja e fundit në një kampionat botëror daton nga viti i largët 1978 kur kishin fituar të bronztën por që kjo pritet të ndryshoj tani pasi që në krye të përfaqësueses ka ardhur Ruben Magnano i cili është i njohur për adhuruesit e basketbollit në mbarë botën si trajner i trofeve.

Në vitin 2002 Argjentina nën udhëheqjen e tij kishte fituar medaljen e argjend në kampionatin botëror ndërsa në vitin 2004 të artën në lojërat Olimpike.

Nëse gjenerata e artë e Argjentinës është në perëndim të saj atëherë kjo e fqinjëve të saj Brazilit është tërësisht në të kundërtën.

Ditët më të mira të Brazilit priten ende të vinë. Me Leandrinho Barbosan,Nene Hilarion dhe Anderson Varejao të cilët janë yje në ligën më të fortë të basketbollit në bot NBA Brazili pritet të jetë surpriza e këndshme këtë vit në Turqi.

Brazili poashtu ka edhe shumë basketbollistë cilësor në mesin e tyre që luajnë në Euroligë dhe ligën braziliane e cila më e forta në Amerikën e Jugore.

Largimi i hershëm në vitin 2006 në kampionatin botëror u dha brazilianëve motivimin e duhur që të mbledhin energjitë dhe të rikthehen furishëm në kampionatin amerikanojugor në vitin 2009 për të fituar medaljen e artë dhe jo vetëm që treguan një sulm fantastik por edhe u treguan si skuadra me mbrojtjen më të mirë në këtë kampionat.

Kështu që duke parë talentin që ka Brazili në këtë kampionat botëror, trajneri Magnano nuk do të ketë nevojë që të lodh kokën në këtë drejtim. Detyra e tij më e vështirë do të jetë që t’i kompozojë të gjitha këto yje se bashku në një betejë të cilën ata nuk e kanë fituar qysh nga viti 1963.

Do të jetë tej mase interesante të shihet paraqitja e Brazilit në grupin B ku do të luaj kundër disa përfaqësueseve më me nam në botë e që padyshim më interesantja do të jetë ndeshja kundër Shteteve të Bashkuara të Amerikës.

Por edhe Kroacia dhe Sllovenia nuk duhet nënvlerësuar, derisa Irani dhe Tunizia nuk pritet që të shkaktojnë ndonjë befasi duke mposhtur ndonjërën nga këto katër përfaqësueset tjera.