Hendboll.Shorti i hedhur në Vjenë të Austrisë për garat e Fituesve te Kupave të Evropës në hendboll, ka dashur që të takohen skuadra nga Kosova, Kastrioti dhe ajo nga Serbia, Knjaz Millosh.

Kjo ndeshje në konkurrencën e femrave do të zhvillohet në muajin nëntor dhe pritet të zgjojë një interesim të madh. Lokacioni i zhvillimit të kësaj ndeshjeje nuk dihet, pasi Federata Evropiane e Hendbollit do të caktojë se a do të zhvillohet në Kosovë, përkatësisht në Serbi, apo në terren asnjanës, i cili është më i mundshmi.

Edhe sporti është bërë politikë!

Kryetari i Federatës së Hendbollit të Kosovës, Mexhit Devaja tha se skuadra kosovare është e gatshme që të shkojë dhe ta zhvillojë ndeshjen në Serbi.

”Ne jemi të gatshëm të shkojmë në Serbi dhe ta zhvillojmë takimin. Edhe në vitet e kaluara kur shorti na ka ra me skuadra të Serbisë, ne kemi qenë të gatshëm të shkojmë për të zhvilluar ndeshjen edhe në terrenin e tyre. Për ketë do të vendosë EHF-i”, ka thënën Devaja.

Ai në vazhdim tha se ka një kërkesë nga shteti i Kosovës që të ndihmohet skuadra e Kastriotit, në mënyrë që të shkojmë dhe të tregojmë lojë të mirë dhe ta mposhtim skuadrën serbe.

Vetëm me përforcime mund t’ia dalim dhe t’i tregojmë Serbisë se jemi të gatshëm ta mposhtim, siç e kemi mposhtur deri më tani, në të kundërtën nëse shkojmë vetëm të paraqitemi, nuk do të jetë mirë, sepse në këtë rast do të tregoheshim shumë të dobët dhe ata do të thoshin se nuk jemi të gatshëm për arenën ndërkombëtare.

Ai në fund tha se edhe sporti është bërë politikë dhe kujtoi ditët kur skuadra serbe nuk kishte pranuar që të luajë me skuadrën e Vëllaznimit, ku sipas tij, ishte çuar në këmbë shteti serb dhe nuk kishte lejuar që ndeshja të zhvillohet.

Jupa: Kam informacione për klubin serb

Trajneri i Kastriotit, Ismet Jupa tha se ka informacione të mjaftueshme për skuadrën serbe, e cila sipas tij, është mjaft cilësore.

“Kam informacione për klubin serb. Kam hulumtuar në internet dhe kam mësuar se bëhet fjalë për njërën ndër skuadrat më të mira në Serbi”, nënvizoi Jupa, i cili më pas deklaroi se skuadra e tij i ka filluar përgatitjet që një muaj, të cilat po shkojnë shumë mirë dhe deri me tani në radhët e veta ka sjellë tri hendbolliste, Shpresa Fazliun, Lumturie Mehmetin dhe Burneta Ramën, por kjo sipas tij, nuk do të jetë e tëra, sepse do të shikohet mundësia edhe e ndonjë transferimi nga jashtë.

Edhe Jupa ishte i mendimit të njëjtë me kryetarin e Federtës, Mexhit Devaja, se ndeshja duhet të zhvillohet në Kosovë dhe në Serbi, por për këtë do të vendosë EHF-i.