Hendboll.“Knjaz Milloshi në Kosovë! Kundër Kastriotit! Jo, nuk është fjala për historinë, ngase, megjithatë këta dy prijës kanë jetuar në shekuj të ndryshëm, por për takimin e hendbollit të skuadrave nga Arangjellovci dhe Ferizaj”, shkruan e përditshmja serbe “Veçernje Novosti”, duke iu referuar ndeshjes ndërkombëtare të hendbollit, të vlefshme për garat e Kupës së Kupave ndërmjet Kastriotit dhe Knjaz Milloshit nga Arangjelllovci i Serbisë, dhe duke e cilësuar shortin si shumë me fat për skuadrën serbe në rrethin e tretë të Kupës së Kupave.

Sekretari i skuadrës serbe, ndërkaq, lidhur me shortin thotë: “E mira e vetme e gjithë kësaj, do të jetë se gjatë këtyre ditëve do të jemi në qendër të vëmendjes së shtypit”, ka thënë me mahi Bojan Nikitoviq. “Nuk dimë asgjë. Kjo ndeshje, nëse do të zhvillohet, është më shumë se sport. Ne, para dy vjetësh po ashtu kemi pasur rival përfaqësuesin nga Kosova, Kosovën e Vushtrrisë, dhe është vendosur që ndeshja të zhvillohet në fushë asnjanëse, në Hungari, por hoqëm dorë nga ndeshja. Do të përcjellim gjendjen... Vetëm të mos jemi viktimë!...”, thotë ai.

Gazeta më tej bën të ditur se operativistët e Kastriotit kanë kontaktuar zyrtarët e skuadrës serbe.

“Kanë thirrur nga Ferizaj. U thash se për 12 vjet sa Knjaz Milloshi merr pjesë në gara evropiane, nuk ka asnjë njollë. As një të vetme! Kemi njëfarë rejtingu, pasi nisemi nga faza e tretë. Kudo që kemi qenë, ka kaluar pa inicidente. Kështu do të jetë edhe tash. Të shohim se çka do të ndodhë deri në nëntor, kur do të jetë në program kjo ndeshje”, thotë Nikitoviq.

Lidhur me këtë ndeshje ka reaguar edhe Velimir Marjanoviqi, kryetar i Federatës serbe të hendbollit, duke shfaqur mendimin se nuk është shumë i brengosur për shkak të ndeshjes Knjaz Millosh - Kastrioti, sepse sheh zgjidhjen...

“Shkojmë udhës që është përcaktuar herën e kaluar. Gjendja është më relaksuese, sesa më herët. Duhet të arrihet marrëveshja që askush të mos dëmtohet. Skuadra nga Kosova nuk është e diskutueshme. Kosova bën gara nën flamurin e EHF-së. Mbi të gjitha edhe shteti insiston në bashkëpunim. Ajo nuk është problem. Të shohim nëse ndeshja do të zhvillohet në fushë asnjanëse, ose do të gjendet ndonjë zgjidhje tjetër. Hendbolli do të duhej të ishte jashtë politikës. Nuk më brengos kjo ndeshje, sepse, kemi përvojë”, thotë Marjanoviq, duke aluduar në ndeshjen me Vëllaznimin e Gjakovës dhe Naisës, që u zhvillua në Hungari, bën të ditur gazeta serbe “Veçernje Novosti”.