Me një motivim dhe intensitet të lartë kanë filluar stërvitjet në klubin e hendbollit Kosova e Vushtrrisë në konkurrencën e meshkujve. Nën drejtimin e trajnerit të ri të angazhuar për këtë stinor, Imer Selmani, djelmoshat e Vushtrrisë kanë filluar me stërvitje për çdo ditë duke përfshirë edhe ditëve të vikendit.

“Pas stabilizimit të klubit me një donator serioz siç është kompania zvicerane e sigurimeve ENB, ekziston një motivim dhe energji e madhe në klub të cilën synojmë ta kthejmë në rezultat”, tha Sadik Xhema, koordinator i klubit. Ai tha se motivimi i madh te lojtarët ka bërë që menjëherë në javën e parë stërvitjet të zhvillohen me intensitet të lartë.

Me energjitë dhe vullnetin që ekziston në gjithë klubin e sidomos tek lojtarët, Xhema thotë se këtë vit synojnë daljen në garat evropiane e po ashtu edhe ta fitojnë edhe kupën e Kosovës. Me 8 fitore dhe 3 humbje, stinorin vjeshtor Kosova e ka përmbyllur në vendin e katërt me 16 pikë, vetëm me dy pikë më pak nga Prishtina dhe Besa që janë në vendin e dytë përkatësisht të tretë.