Serbia vërtet di të shfrytëzojë çdo situatë të krijuar për të siguruar përfitime karshi Kosovës. Në këtë vend është duke u mbajtur kampionati evropian i hendbollit, ndërsa njëri ndër njerëzit më të intervistuar ka qenë vetë kryetari i Federatës Evropiane të Hendbollit, Tor Lian, i cili nuk u ka shpëtuar dot pyetjeve në relacion me Kosovën, e cila është anëtare me të drejta të kufizuara e familjes evropiane të hendbollit.

Serbëve së fundit iu ka penguar harta të cilën e ka paraqitur EHF, në të cilën Kosova ka figuruar e ndarë nga Serbia dhe për këtë i është bërë presion Lianit.

“Situata është kështu, Kosova nuk është anëtare me të drejta të plota në EHF dhe derisa Kombet e Bashkuara nuk e pranojnë, as ne nuk do t’i pranojmë. Ata janë shumë aktivë, në secilin takim kërkojnë pranim, por përherë marrin të njëjtën përgjigje – nuk ka lidhje nëse dëshirojmë t’ju pranojmë apo jo, rregulli është se nuk mund të bëheni anëtar deri sa Kombet e Bashkuara nuk ju pranojnë”, tha Lian.

Këto deklarata të njeriut të parë të EHF-it nuk e kanë brengosur aspak të parin e Federatës së Hendbollit të Kosovës (FHK), Mexhit Devaja.

“Kjo nuk është hera e parë e as e fundit që serbët shfrytëzojnë rastin që të thonë se hendbolli i Kosovës nuk do të anëtarësohet kurrë në EHF me të drejta të plota, përderisa nuk do të jetë pjesë e Kombeve të Bashkuara. Mua nuk më brengosin as deklaratat e Lianit. Ai duhet të shkoj në Beograd dhe të ballafaqohet me gjithçka”, tha Devaja.

“Nuk e di pse po polemizohet pranimi, kur dihet se ne jemi qe tetë vite brenda EHF-it. Hendbolli kosovar është gjithnjë aty ku janë pjesa tjetër e Evropës, në çdo takim apo kongres që mban EHF-i. Klubet tona luajnë në Evropë, arbitrat tanë ndajnë drejtësinë në ndeshjet evropiane. Mungon vetëm e drejta e votës dhe pjesëmarrja e ekipit përfaqësues, e që së shpejti do të arrihet edhe kjo”.

Devaja shprehet optimist se koha e njohjes nuk është larg, derisa ka paralajmëruar shkuarjen e tij në Beograd, ku po mbahet kampionati evropian i hendbollit.

“Në EHF nuk vendos vetëm Liani, por aty ka një Komitet Ekzekutiv dhe një Kongres të EHF-it. Ata e thonë fjalën e fundit për gjithçka. Pra ne nuk do të ndalemi së punuari dhe të kërkojmë atë që na takon. Në qershor do të mbahet kongresi i EHF-it dhe ne edhe aty do të kërkojmë njohje të plotë”, tha presidenti i FHK-ës, duke shtuar se ndërkohë, gjatë muajve të ardhshëm, do të ketë një agjendë të ngjeshur, me takimet me anëtarët e Komitetit Ekzekutiv të EHF-it, para kongresit të radhës.

“Unë e kam marrë ftesën për të marrë pjesë në kampionatin që po mbahet në Serbi dhe do të shkoj atje të jem në mesin e të gjithë kryetarëve të federatave evropiane. Kjo faktikisht do të thotë se jemi pjesë e EHF-it dhe jam i barabartë”, tha Devaja.