Nuk mbahet mend që një drejtues i sportit kosovar të ketë udhëtuar për në Beograd, për ta përcjellë një ngjarje sportive në 20 vjetët e fundit. Të paktën jo hapur dhe jo në Kosovën e pasluftës kur ndasitë ndërmjet dy shteteve edhe në segmentin sportiv janë shumë të mëdha.

Mirëpo, çdo gjë e ka herën e parë e kështu ndodhi edhe me kryetarin e Federatës së Hendbollit të Kosovës, Mexhit Devaja, i cili tashmë ka thyer barrierat dhe ka dëshmuar se kur nuk mungon vullneti dhe dëshira arrihen të gjitha.

Devaja, së bashku me anëtarin e Bordit të FHK-së, Nebi Zariqin dhe kryetarin e Federatës së Hendbollit të Shqipërisë, Murteza Miftari, ka përcjellë ndeshjet e kampionatit evropian të hendbollit, i cili dje ka përfunduar në Beograd. Ai kishte shkuar me ftesën e drejtuesve të hendbollit evropian (EHF) dhe kudo është paraqitur se kryetar i një Federate të një shteti, që pret dritën e gjelbër për t’u pranuar me të drejta të plota edhe në hendbollin botëror.

“Unë edhe në Beograd kam prezantuar hendbollin e Kosovës, dhe kjo ka qenë e qartë për të gjithë, pavarësisht se i pëlqeu kjo dikujt apo jo. Madje, mund të them se ardhja ime ka ndryshuar shumëçka pozitivisht në pikëpamjet e drejtuesve të shumë federatave të hendbollit të shteteve evropiane rreth hendbollit tonë, por edhe të vetë drejtuesve të hendbollit të Serbisë”.

“Kam pasur takime me drejtuesit e hendbollit evropian e botëror, por edhe me ata të shteteve të ndryshme, ndër të cilët edhe ata të Serbisë. Të gjithë kanë qenë shumë të sjellshëm dhe në çdo moment të afërt me ne, duke u interesuar shumë se si po ndihemi, a kemi ndonjë telashe dhe në çdo hap kanë qenë me ne”, tha Devaja.

Ai përsëriti se nuk ka pasur as telashen më të vogël. “Për tre ditë në asnjë moment nuk jemi lënë anash, të gjithë e kanë kuptuar realitetin e ri, madje edhe pushtetarët serbë. As që mund të flitet për ndonjë presion apo diçka të tillë nga vendësit në hotel, në palestër e as në qytet”, shprehet kryetari i FHK-së, Mexhit Devaja.

Çka tutje me hendbollin kosovar? “Kam biseduar dhe jam konsultuar me kryetarin e Hasan Moustafa, kështu që në ditët në vazhdim do të takohem edhe me disa drejtues të federative të shteteve të rëndësishme në hendboll, në mënyrë që të marr mbështetje për pranimin e hendbollit tonë me të drejta të plota. Në këtë aspekt jam shumë optimist, për të mos thënë se pas kësaj vizite pranimi është punë e kryer”, tha ai.