Pas mosangazhimit të asnjë lojtari në afatin kalimtar, kryetrajneri i Prishtinës, Taip Kabashi nuk është i brengosur për fondin që ka skuadra e tij. “Ne kemi marrë 4-5 hendbollistë cilësorë në afatin e rregullt kalimtar dhe tash nuk kishim nevojë për hendbollistë nga treva e Kosovës, pasi nuk janë më shumë se një apo dyqë do të bënin punë”, tha Kabashi.

Ai mendon se edhe hendbollistët e huaj që po vijnë në Kosovë, nuk janë të cilësisë së dëshiruar. “Kemi nevojë për hendbollistë të huaj, por këta që po vijnë këtu, veçmas nga Maqedonia, nuk kanë cilësi të mirë, madje janë në nivelit të hendbollistëve tanë dhe ky është rast i mirë që u jepet hendbollistëve të rinj, të cilët duhet ta shfrytëzojnë si është më së miri”.

Mbetja me përbërjen e njëjtë nuk ndryshon ambiciet e klubit. “Në asnjë mënyrë, si zakonisht ne do të luftojmë në të dy frontet në kampionat dhe në atë të Kupës. Në garat kampionale kemi mbetur prapa Kastriotit për katër pikë, por në pranverë e kemi orarin më të përshtatshëm. Përveç kësaj tash do të aplikohet gara shtesë (play-off) dhe ky është rast edhe për skuadrat tjera. Mendoj se përveç Kastriotit, Besa Famiglia e Prishtinës, edhe Trepça e Kosova mund të bëjnë diçka”, tha kryetrajneri i KH Prishtina, Taip Kabashi.