Pas suksesit të madh që karateistët e Kosovës e arritën në Austri, ata dje mbajtën konferencë për shtyp në të cilën folën jo vetëm për suksesin e arritur, por edhe për aktivitetet që i presin gjatë këtij viti. Kryetari i Federatës së Karates së Kosovës (FKK), Fadil Arifi bëri një përmbledhje por edhe paralajmëroi aktivitetet e ngjeshura gjatë këtij viti, për të cilat kërkohet ndihmë nga Ministria dhe donatorët.

Përfaqësuesi i Departamentit të Sportit Ibër Alaj përgëzoi garuesit, duke u premtuar se edhe në të ardhmen do ta kenë mbështetjen e ministrisë, ndërkohë që përzgjedhësi Ylber Syla tha se ka shumë garues cilësorë dhe se do ta ketë vështirë ta bëjë përzgjedhjen, por edhe shtetet më të forta të karatesë do ta kenë vështirë kundër nesh.

Fituesi i medaljes së artë Afrim Latifi ka bindjen se nga çdo garë kosovarët mund të kthehen me medalje. Më 18 shkurt pritet të mbahet turneu i pavarësisë, ku pritet pjesëmarrje e madhe e garuesve vendorë e ndërkombëtarë. Në shkurt do të mbahet seminari dhe licencimi i gjyqtarëve, kurse në prill seminari i trajnerëve të karatesë. (B.B.)