Delegatët e kuvendit të Federatës së Futbollit të Kosovës (FFK) e dinë datën dhe vendin e mbajtjes së kuvendit zgjedhor, mirëpo nuk kanë haber se për çka do të diskutohet në atë kuvend, përveç se do të zgjidhet kryetari.

Vetëm katër ditë para mbajtjes së kuvendit, shtëpia e futbollit kosovar nuk ka shpërndarë asnjë dokument për klubet dhe delegatët, duke thyer sërish statutin e saj. Në bazë të Statutit të FFK-ës ajo është e obligueshme që së paku një muaj t’u dërgojë materialin e kuvendit të gjithë delegatëve që janë caktuar të marrin pjesë.

Kjo gjë nuk i ka befasuar aspak klubet dhe ata që do të marrin pjesë në këtë kuvend, të cilët janë shprehur se kjo është gjë e zakonshme para mbajtjes së kuvendeve. Ato thonë se edhe më parë ka ndodhur kjo dhe askush nuk dhënë përgjegjësi për këtë lëshim. Disa klube i kanë pranuar vetëm ftesat, e disa të tjerat, përveç materialit, nuk kanë as ftesë. “Nuk kemi marrë as më pak e as më shumë sesa një ftesë nga Federata, para mbajtjes së kuvendit të 2 shkurtit”, tha drejtori i FC Prishtina, Sokol Krasniqi. “Kjo është shumë jo profesionale nga ana e Federatës, por asgjë e re, pasi që edhe në ta kaluarën kemi marrë vetëm nga një ftesë apo as edhe atë”.

Presidenti aktual i FFK-së, Fadil Vokrri i kishte marrë firmat e të gjitha klubeve kosovare, përveç atyre të FC Prishtina, ku ka bërë karrierën më të madhe si futbollist në Kosovë, duke e bllokuar kështu çdo kandidaturë tjetër në garën për president të ri. “Nuk mendoj se këtu ka të bëjë me ndonjë hakmarrje, do të ishte absurde të mendohej ashtu. Kjo nuk është hera e vetme që FFK-ja anashkalon Statutin e saj para mbajtjes së këtij kuvendi. Ajo më herët këtë e kishte bërë edhe me rastin e mbajtjes së kuvendeve zgjedhore nëpër shtatë rajonet e saj, të cilat nuk ishin mbajtur kurrë në katër vjetët e fundit, duke krijuar anarki”.

Për Krasniqin realisht FFK-ja ishte dashur të njoftojë kuvendarët se për çka do të diskutohet në kuvend. Mirëpo, duket se Prishtina është e privilegjuar, pasi që klubet tjera, jo që nuk e kanë kurrfarë materiali, por nuk kanë marrë as ftesë për kuvend.

“Deri sot kurrgjë nuk ka ardhur në klub, as material, e as ftesë”, tha sekretari i KF Trepça’89, Sabedin Morina.

“Unë jam ai që i pranoj të gjitha dokumentet në klub dhe më pas i shpërndaj. Deri në ditën e sotme jam i sigurt se nuk ka arritur asgjë nga federata lidhur me mbajtjen e kuvendit”, shtoi Morina.

Pa ftesë e material ka mbetur edhe një pjesëmarrës i kuvendit zgjedhor. Bashkim Kajdomçaj, përfaqësues i KF Liria, tha të se pos lajmit të Bordit të FFK-ës për mbajtjen e kuvendit zgjedhor, vitin e shkuar, deri më tashti nuk ka asnjë informacion shtesë. “Unë nuk kam marrë asnjë material, qoftë edhe ftesë, para mbajtjes së kuvendit zgjedhor”, tha Kajdomçaj. “Deri të dielën në orën 15:30 nuk kam as letër, e as konfirmim me gojë nga federata për kuvendin.

Veç një e di, e ajo është se kuvendi do të mbahet më 2 shkurt”. Ndërkohë tentimet që të merret ndonjë prononcim nga FFK-ja lidhur me mosshpërndarjen e materaialeve për delegatët kanë dështuar, pasi që zëdhënësi i FFK-ës, Fazli Berisha, nuk kishte qasje në telefon.

Me 2 shkurt kuvendarët e futbollit kosovar do të zyrtarizojnë mandatarin e ri/vjetër të FFK-ës për katër vitet e ardhshme. Kandidati i vetëm do të jetë kryetari i deritanishëm, Vokrri, pasi që nuk do të ketë asnjë kundërkandidat.

Megjithatë përveç kësaj, sigurisht se ka edhe mjaft çështje tjera të rëndësishme që duhet të diskutohen në forumin kryesor të futbollit kosovar, por për këtë nuk e dinë së paku disa nga përfaqësuesit e skuadrave kryesore të Kosovës që janë të sipërpërmendura.

Kuvendi i fundit i rregullt i FFK-së, që është mbajtur më 25 gusht, kishte zgjatur më pak se një orë, e ky i fundit siç duket, do të zgjasë edhe më pak. Edhe në atë kuvend ka pasur vonesa enorme me materialet e kuvendit për delegatët, disa prej të cilëve i kishin marrë ato vetëm ditën e fundit, duke e bërë atë kuvendin më të shkurtër në histori të pavarësisë së futbollit kosovar në 20 vjetët e fundit.