Gara e radhës në skitarinë e Kosovës këtë sezon nuk ka sjellë asnjë risi, derisa garuesit e KS Alpi nga Peja i kanë marrë thuajse të gjitha vendet e nderit, sikurse edhe një javë më parë në garën e Arxhenës. Garuesit e ekipit pejan kanë triumfuar në 12 nga 14 garat sa janë mbajtur në të gjitha kategoritë në garën e kupës së Kosovës, e mbajtur të dielën në Bogë të Rugovës.

Dy vendet e para të tjera janë fituar nga garuesit e KS Pashtriku dhe KS Peja. 105 garues nga 10 klube kosovare kanë ngarë disiplinën e sllallomit. Dorina Memaj e Alpit ka dalë fituese në garën e senioreve me kohë prej 49 sekondave e 13 të qindëtat, ndërkohë që ndër seniorë i pari ishte skiatori po ashtu i KS Alpi, Dardan Pupovci, i cili e kaloi shtegun për 39 sekonda e 88 e të qindëtat. “Ishte një garë e suksesshme, ku garuesit e rinj treguan kualitete të mira dhe që në të ardhmen nga ta mund të priten edhe rezultate shumë më të mira”, tha kryetari i Federatës Skitare të Kosovës, Hajrush Demaj.

“Lajm i mirë ishte së kjo garë ishte masive, me pjesëmarrjen e thuajse të gjitha klubeve dhe të gjithë garuesve kosovarë”, shtoi ai. Fituesit nëpër kategori janë: Yllka 1: Arba Pipovci (Alpi) 51,31 sekonda; Fatosat 1: Bashkim Gashi (Alpi) 1,05,80 minuta, Yllka 2: Blerta Mekaj (Alpi) 49.98 sekonda; Fatosat 2: Liri Kelmendi (Alpi) 47,45; Pioneret e reja: Nita Zajmi (Alpi) 58,35; Pionerët e rinj: Ardi Pupovci (Alpi) 44, 27; Pioneret e vjetra: Dea Alixhiku (Alpi) 45,86; Pionerët e vjetër: Eron Burri (Alpi) 37,63; Junioret e reja: Venesa Gjukaj (Peja) 46,74; Juniorët e rinj: Berat Mekaj (Alpi) 44,12; Junioret e vjetra: Fjolla Xharavina (Pashtriku) 58,70; Juniorët e vjetër: Eordejt Pupovci (Albi) 42,44; Senioret: Dorina Mema (Alpi) 49.13; Seniorët: Dardan Pupovci (Alpi) 39,88. Gara e ardhshme pritet të mbahet sërish në Bogë, Kupa e Alpeve shqiptare, e cila është në kalendarin zyrtarë të garave të FSK-ës. B. D.