Nga garat e deritashme të edicionit të sivjetmë në skitarinë kosovare, bie në sy suksesi në 4 gara radhazi i 7-vjeçarit, Bashkim Gashi.

Sporti i skive është ndër sportet më të shtrenjta dhe marrja me te nuk është e lehtë veçmas në Kosovë, gjithnjë duke ditur standardin e jetesës.

Ndonëse jeton në Prishtinë, Bashkimi i talentuar është anëtar i klubit të Alpit të Pejës, dhe ky vit ka nisur shumë mirë për të.

Kështu, më 14 janar në Bogë, Bashkimi doli i pari në garën e sllallomit, kurse një ditë më pas ngadhënjeu edhe në garën e sllallomit të madh. Më 22 janar, gara e sllallomit të madh u mbajt në Brod të Dragashit, ku ai përsëri doli i pari.

Formën e tij të mirë e dëshmoi edhe më 29 janar në Bogë, ku në garën e sllallomit ishte më i miri. Medaljet e fituara mbase janë motiv i madh për një sportistë qoftë edhe në moshë të re, siç është Bashkimi, i cili tashmë po përgatitet për garën e ardhshme, e cila është pas një jave në Brezovicë apo në Bogë.

“Natyrisht se ndihem i lumtur për sukseset e Bashkimit, i cili është mëshiruar me këtë sport dhe kjo na jep vullnet për ta mbështetur, ndonëse nuk e kemi të lehtë kur dihet se është sport i shtrenjtë”, tha babai i tij, Burimi.

Nuk janë rastet e rralla kur sportistët e mëdhenj e nisin karrierën rastësisht, e duket se kjo i ka ndodhur edhe Bashkimit të vogël.

“Para dy vjetëve, nuk ndihesha mirë dhe shkova në Bogë të pushoj pak. Atje kishte shumë borë dhe Bashkimin kjo e joshi aq shumë sa që ishin të detyruar ta regjistrojmë në klubin e Alpit. Tani falë edhe trajnerit Agim Pupovci, ai po merret me këtë sport, madje ka nisur edhe të shënojë fitore, për ç’gjë jemi të lumtur dhe shpresojmë se do të vazhdojë kështu edhe në të ardhmen”, tha Burim Gashi.

Fillimi i mirë është gjysma e punës së kryer, mbetet të shihet në të ardhmen si do të vazhdojë karriera e Bashkim Gashit.