Gati dy orë ka zgjatur senaca pa gjetur një “pse” të vërtetë mbi motivet që e kanë shtyrë Gary Speed ta varte veten në garazhin e shtëpisë së tij në atë mëngjesin e kobshëm të 27 nëntorit, i definuar jorastësisht si “dita më e keqe e jetëve tona” nga bossi i League Manager’s Association, Richard Bevan.

SHEARER I TRISHTUAR – Është e vërtetë siç u kuptua në këtë seancë verën e kaluar, gjatë një pushimi së bashku në barkë në jug të Francës, selektori i Uellsit iu kishte rrëfyer mikut të tij Alan Shearer se ka disa probleme me bashkëshorten e tij Louise, siç mund t’iu ndodhë të gjithëve pas 15 vjetëve martesë.

Ka qenë ish-kampioni i Newcastle, sot komentator televiziv, që e ka rrëfyer një gjë të tillë, duke bërë të ditur mes tjerash që ai dhe Speed ishin së bashku në një studio televizive një ditë para tragjedisë, duke lënë mes tyre një takim për një darkë bamirësie, ku duhej të merrnin pjesë që të dytë javën e ardhshme.

“Ai nuk dukej i shqetësuar për diçka dhe prisja telefonatën e tij të hënën, ndërkaq të dielën e mora lajmin e hidhur dhe mbeta i shokuar, sepse Gary është njeriu i fundit nga i cili do ta prisja një gjest të tillë. Vdekja e tij nuk ka pasur dhe vazhdon të mos ketë ende asnjë kuptim për mua”, shpjegoi në këtë seancë miku i tij i ngushtë, Shearer.

BUZËQESHJA FALS – Por nëse për Shearer miku i tij ishte i qetë, për nënën Carol, që ishte në shtëpi para tv duke shikuar BBC, nuk ishte kështu: “Kur e pashë në emision, e vërejta se buzëqeshja e tij nuk vinte nga sytë, ishte një buzëqeshje e rreme”, tha nëna e Speed në seancë, duke i mbajtur lotët dhe më pas falënderoi Federatën e Uellsit për Gary Speed Memorial Match ndërmjet Uellsit dhe Kosta Rikës, që do të luhet më 29 shkurt në Cardiff.

ZËNKA ME BASHKËSHORTEN – Jashtëzakonisht prekëse ka qenë në fund dëshmia e bashkëshortes së Gary Speed. Ajo ka treguar se kishte pasur një zënkë banale me burrin e saj para se ai të bënte vetëvrasje, pas kthimit nga një festë, gjatë së cilës në një moment të caktuar Speed ishte hedhur në pishinë me rroba (“Nuk më kujtohet motivi, ka qenë një diskutim mbi gjithçka dhe për asgjë”) dhe katër ditë para vdekjes, burri i saj i kishte dërguar një sms në të cilën kërcënonte se do të bënte vetëvrasje, por edhe duke thënë se do të vazhdonte jetën për shkak të dashurisë që ndiente për gruan dhe dy djemtë e tij.

VDEKJE AKSIDENTALE? – Megjithatë, sipas mjekut ligjor, Nicholas Rheinberg, nuk ka shpjegime të mjaftueshme që e justifikojnë gjestin e Speed, që ka mundur të jetë jo me “qëllim” por “aksidental”. Praktikisht, sipas këtij eksperti, ish-kampioni uellsian mund të ketë vdekur pasi që ishte shtrënguar me një litar në qafë si një gjesti i tij për mënyrën se si bashkëshortja e tij ishte kthyer në shtëpi pas zënkës së tyre.

Pas fjalosjes në taxi, Louise kishet shkuar në makinën e saj “që t’i qartësojë idetë e saj” dhe aty e kishte zënë gjumi: vetëm në orën 7 të mëngjesit, Louise e kishte gjetur trupin e burrit të saj në garazh. Por, ardhja e mjekëve kishte qenë tepër e vonuar. Speed tashmë kishte vdekur. Siç duket, pa një “PSE”.