E enjtja do të shënojë ditën e fillimit të përgatitjeve të boksierëve kosovarë për garat që i presin këtë vit. Lajmi është bërë i ditur nga Federata e Boksit e Kosovës (FboxK) të mërkurën. Boksierët më të mirë të Kosovës do të qëndrojnë në Durrës, ku edhe fillon misioni i tyre për vitin 2012.

“Këto përgatitje janë të domosdoshme për një paraqitje sa më të mirë të boksierëve tanë në garat që i presin këtë vit”, tha zëdhënësi i FboxK-ës, Latif Demolli. “Katër boksierë juniorë, dy boksiere, shtatë boksierë seniorë, dy trajnerë dhe një përgjegjës, për dhjetë ditë me radhë do të përgatiten në Durrës”, shtoi Demolli.

Sfida e parë e kosovarëve do të jetë turneu i Pavarësisë që do të mbahet më 18 shkurt në Prishtinë, ku pritet pjesëmarrja edhe e garuesve nga Kroacia, Bosnja, Mali Zi, Maqedonia dhe Shqipëria. Boksin kosovar e pret një orar i ngjeshur në muajin shkurt dhe mars. Kosova më 5 shkurt do të marrë pjesë në turneun “Mimoza Cup” që mbahet në Mal të Zi, pastaj prej 21-26 shkurt në turneun e madh ndërkombëtar “Strangjat” që mbahet në Bullgari dhe në atë “Zllatko Hrbiq” që mbahet në Kroaci.