Tefik “Uragani” Bajrami do të boksojë në turnirin e boksit në kategorinë e rëndë më 13 prill në Paris. I gjithë ky spektakël që e organizon organizata “Bigger`s Better” do të transmetohet drejtpërdrejt në televizionin sportiv, Eurosport.

Uragani i cili njihet edhe si tajbokser i suksesshëm (kampion i botës në amatorizëm 2004) dhe po ashtu kampion i Zvicrës në boksin amator, prej tetorit të vitit 2010 ka kaluar me shumë suksese në boksin profesionist, ku prej 4 ndeshjeve të zhvilluara, i ka të gjitha fitore (3 me nokaut). Ai paralajmëron se më 14 korrik në Podujevë do të paraqitet para bashkëvendësve të vet.

Tefik Bajrami është vëllai i kampionit aktual të botës në kikboks, Xhavit Bajrami, i cili parashihet që në pranverë ta mbrojë titullin në Zvicër dhe më pastaj do ta mbrojë titullin e botës për herë të parë në Shqipëri, përkatësisht më 28 nëntor, në 100 vjetorin e pavarësisë së Shqipërisë.