Mundje. Naim Muja pritet të jetë zyrtari i dytë i sportit kosovar, që do të shkelë Beogradin, ku nga 6-11 mars do të mbahet kampionati evropian në mundje, në stilin greko-romak dhe të lirë.

Presidenti i Federatës së Mundjes i Kosovës (FMK) do të jetë në mesin e presidentëve të federatave tjera evropiane në kryeqytetin serb, sikurse ai i Federatës së Hendbollit të Kosovës (FHK), Mexhit Devaja, i cili javën që shkoi qëndroi në Serbi, për të përcjellë pjesën përfundimtare të kampionatit evropian, i cili gjithashtu u mbajt në Beograd.

Muja të premten ka paralajëmruar se së bashku me garuesit e tij do të jetë pjesë e evropianit, pasi që këtë ia mundëson pranimi i federatës së tij në atë ndërkombëtare (FILA).

“Me kismet do të shkoj në Beograd, së bashku me garuesit e mi dhe do të jemi pjesë e kampionatiti evropian”, tha ai. Bile presidenti i FMK-së premton se në kryeqytetin serb shkon të fitojë medalje. “Nuk do të shkojmë në Berograd veç për të marrë pjesë, por do të shkojmë të marrim medalje. Unë besoj në garuesit e mi, e kjo do të thotë se nga atje nuk do të kthehemi duarthatë”.

E panjohura e vetme për momentin për Mujën është se nuk e di se me sa garues do të shkohet në kampionation evropian. “Ne i kemi dhjetë garues të licencuar në Federatën Ndërkombetare të Mundjes, por ende nuk e dimë numrin e saktë të garuesve, që do të udhëtojnë në Beograd. Aktualisht jemi duke e bërë një seleksionim dhe vetëm pas 3-4 ditëve do të dijmë se me sa garues do të përfaqësohemi”, tha presidenti i FMK-së.

Megjithatë, Muja tha se Kosova pritet të përfaqësohet në evropianin e mundjes më së paku katër garues. “Kemi kohë deri para fillimit të garave që të paraqesim se me sa garues do të marrim pjesë në gara. Mirëpo, sipas të gjitha gjasave do të regjistrojmë për pjesëmarrje së paku katër garues, por ky numër edhe mund të jetë edhe më i madh”, shtoi Muja.

Në këtë kampionat pritet të marrin pjesë 48 vende evropiane të kontinentit të vjetër.

FMK-ja është anëtare e federatës ndërkombëtare të mundjes, FILA dhe si e tillë pritet të paraqitet në këtë evropian, ndonëse nuk do të jetë e befasishme pengesa nga serbët.

Vitin e kaluar Kosova është paraqitur në kampionatin evropian të mundjes, që është mbajtur në Dortmund të Gjermanisë.

B. Devaja