Xhudo. Majlinda Kelmendi ka përfunduar e pesta në turneun e mbajtur të shtunën në Paris të Francës, duke e trashur kështu konton e saj Olimpike. Xhudistja më e mirë kosovare tashmë e ka siguruar pjesëmarrjen në Lojërat Olimpike “Londra 2012”, mirëpo është duke luftuar për pozitë sa më të mirë në mesin e më të mirave të botës.

Kelmendi e ka fituar duelin e saj të parë, në kryeqytetin francez për më pak se një minutë ndaj gjermanes Romi Tarangul, me Juko që e fitoi pas dy vërejtjeve të kundërshatres nga ana e gjyqtarëve dhe një vazari. Mirëpo, ajo e humbi luftën e saj të dytë me spanjollen Ana Carrascosa, për shkak të një lëvizje të saj të parregullt, që edhe e diskualifikoi.

“Këto gjëra tregojnë se sa vështirë është të bëhesh sportist kulminant dhe të humbësh luftën e fituar. Kjo është sikur kartoni i kuq në futboll, i cili ia prishi lojën Majlindës”, tha Agron Kuka, kryetari Federatës së Xhudos së Kosovës, i cili ndjeki meçin nga tribinat e palestrës së Parisit, në të ciliën ishin mbledhur afro 10 mijë shikues.

“Paraqitja e Majlindës ishte për çdo respekt. Ajo ka treguar se është në mesin e xhudisteve më të mira në kategorinë e saj. Gabimet e këtilla ndodhin në çdo sport, por duhet të pajtohemi me këtë fat”, shtoi Kuka.

Në garën Grand Slamin e Parisit janë paraqitur xhudistet më të mira në botë.