2 shkurti është ditë e lumtur në shtëpinë Pique. Në këtë datë sikurse Gerrad Pique, mbrojtësi që luan te Barcelona, ashtu edhe e dashura e tij, këngëtarja Shakira, festojnë ditëlindjet e tyre. Ndërkaq, këtë vit çifti, ndër më të përforlurit në ambientin spanjoll, feston edhe përvjetorin e parë “mediatik”, pasi që lidhja e tyre ishte bërë publike pikërisht një vit më parë gjatë ditëlindjes së tyre.

Duket se për ta edhe kjo ditëlindje ka qenë me fat. Kanali televiziv spanjoll RCN ka treguar se Pique dhe Shakira të dielën e fundit e kanë kaluar në një kartodrom së bashku me të ftuar të tjerë, ndër ta edhe Cesc Fabregas dhe Carles Puyol. Festimet kishin vazhduar deri në mesnatë dhe interesim të madh kishte zgjuar dhurata e mbrojtësit spanjoll për bukuroshen e tij: një Mercedes Benz që i ka kushtuar 50.000 euro. Në anën tjetër pop këngëtarja kolumbiane si dhuratë kishte zgjedhur diç më të ëmbël dhe personale: të dashurit të saj Pique, Shakira i kishte dhuruar një tortë gjigante me portretin e tij në të.