Trajneri i ekipit të Kelnit, Stale Solbakken, ka pranuar se njeriu i tij i javës, Odise Roshi nga Shqipëria, i cili i siguroi ekipit fitoren në ndeshjen e së dielës te Kariserslautern, kishte menduar kthimin e tij në shtëpi.

Fitorja kishte jehonë, sepse Kelni nuk fitonte në fushën e Kaizerslauternit prej 22 vitesh, ndaj edhe goli i mesfushorit kuqezi u shënua shumë në Gjermani.

Roshi luajti si zëvendësues dhe u fut në lojë në minutën e 70-të të pjesës së dytë në vend të Slavomir Peszko. Por, pas vetëm dy minutash një asist i Kristian Klemens u shfrytëzua më së miri nga shtatlarti shqiptar, i cili me kokë nuk e pati të vështirë për ta dërguar topin në rrjetë.

NORVEGJEZI - Tekniku norvegjez këtë e pranoi në një bisedë për të përdishmen e vendlindjes së tij, Dagbladet. “Ai luajti shumë mirë për vetëm dy minuta sa shënoi golin. Ai ishte një botë krejt tjetër, por është interesante se ai kohë më parë ndjehej keq në ambientimin dhe e mendonte edhe kthimin në shtëpi”, tha Solbakken. Ai pas shënimit të golit i është hedhur në krah trajnerit për të falënderuar për mbështetjen që i kishte dhënë.

Trajneri ka lavdëruar shqiptarin, por edhe ekipin. “Roshi? Cilësitë e tij nuk kanë qenë asnjëherë në diskutim. Jam shumë i kënaqur me skuadrën që bëri një punë shumë të mirë dhe arriti të siguronte një fitore në një fushë tepër të ndërlikuar”.

Vetë trajneri, sipas futbollistit fierak, ishte shprehur në humor me bashkëlojtarët e tij. “Më përgëzoi dhe filloi të bënte humor. Në një moment iu tha shokëve: ej, nesër prisni që në stërvitje dikush të na vijë me birra për ta festuar… Mbase nuk do të jetë vetëm, do ketë edhe shqiptarë të tjerë… Nisëm të qeshnim të gjithë”, tha mesfushori.

ROSHI – Vetë futbollisti i cili shënoi golin e parë në Bundesliga që nga transferimi prej Flamurtarit të Vlorës tha se ishte emocionuar tej mase pas golit të shënuar. “Pas golit, normal që u emocionova, por tani jam i qetë. Më shumë isha i emocionuar në minutat e fundit se pata frikë mos na barazonin. Golin ia dedikova motrës që ka ditëlindjen”, tha ai. Megjithatë duket se lojtari ka kuptuar regjimin profesionist. “Nëse shkoj qoftë edhe një minutë me vonesë, penalizohem. Solbanken është shumë i rreptë”, tha 20 vjeçari.

“Po mendova se jam VIP, do të kem probleme. Unë jam akoma tek ‘A’-ja. Kam shumë punë për të bërë. Këtu nuk është e lehtë të ecësh, sepse janë të gjithë super”.

Megjithatë, konkurrenca për në ekipin e parë vazhdon. “Në fillim kisha probleme me shumë gjëra. Me gjuhën, me stërvitjen, me ambientin. Tani ndihem shumë më mirë. Problem kam mbrojtësit kundërshtarë… (qesh). Përveçse janë shumë të fortë, janë edhe shumë të shpejtë. Nuk është asnjëherë e lehtë t’i lësh mbrapa”, tha Roshi, i cili ka luajtur në 11 takime deri tani, por gjithmonë i aktivizuar nga stoli i rezervave.