Pjesën dërrmuese të kohës adoleshentët e kalojnë në internet, mbase kjo është mënyra më e mirë për argëtim. Mirëpo jo gjithnjë interneti është i dobishëm, ngase të qëndruarit pranë kompjuterit mund të shkaktoj dëm edhe për shëndetin.

Ela Jashari është njëra nga shumë vajzat që qëndron mjaft shumë pranë kompjuterit. “Unë si nxënëse e shkollës, përveç që merrem me aktivitetet shkollore, përdor edhe internetin. Më intereson të di më shumë për jetën e vipave tanë, por edhe atyre të huaj. Deri më tash kam mësuar shumëçka për jetën e tyre.

Unë, në internet përdor edhe “mesenxherin”. Komunikoj me shoqërinë time. Nga interneti mësoj shumë gjëra interesante. Mirëpo, meqë unë jam e dhënë pas muzikës, në faqen “My music” kërkoj muzikë të ndryshme.

Nuk mungojnë as faqet e agjencive të ndryshme. Aty kërkoj lajme të ndryshme dhe më bën të ndihem shumë më mirë kur na është dhënë kjo mundësi, që edhe interneti tash në ditët e sotme të jetë në shtëpitë tona”, ka thënë ajo.

Edhe Gëzim Dauti thotë se nuk mundet pa internet. Pjesën dërmuese të kohës ai e kalon në kompjuter, ndonëse kjo ndonjëherë edhe po ia merr kohën e mësimit, mirëpo nuk mund të shkëputet nga interneti.

“Nuk mund të rri pa internet, tashmë sikur jam bërë i varur prej tij, edhe mësimet i kam lënë paksa anash. Mirëpo po gjejë materiale mjaft interesante. Ka ueb faqe që janë të pasura me shumëçka dhe na japin njohuri nga të gjitha sferat.

Mirëpo ajo që më jep më shumë argëtim është “msn-ja” sepse me anë të saj kam mundësi të komunikoj me shumë shokë e shoqe”, shton ai.

Të paktë janë ata të rinj që internetin e shfrytëzojnë pasi t’i kryejnë obligimet shkollore. Ndër ta është Dona Salihu e cila internetin e shfrytëzon vetëm kur ka kohë të lirë. “Internetin e përdor pas orarit të mësimit.

Internetin e dua shumë, sepse më pasuron me shumë gjëra, madje mund të lexoj edhe lajme të ndryshme nga fusha të ndryshme, si brenda ashtu edhe jashtë vendit. Ndërsa, faqja ku unë gjej argëtim më shumë është “YouTube”, aty mund të shoh dhe dëgjoj muzikë të ndryshme, si nga vendi ashtu edhe të huaj, por edhe yjet e Hollivudit.

Por, edhe në “mesenxher” rri shumë, bisedoj me shoqe dhe kohën e lirë e kaloj duke u zbavitur me shoqërinë time”, thotë ajo. Pra adoleshentët janë të pasionuar pas internetit, disa e shfrytëzojnë në momentin e duhur e disa e humbin kohën kot.