Është bërë thuaja përditshmëri që të rinjtë dhe të rejat të mbajnë bizhuteri të ndryshme. Një pjesë e tyre thonë se janë të dhënë pas aksesorëve dhe ato zakonisht i përdorin më shumë kur janë në ndonjë ndejë, ceremoni gazmore, apo edhe në ndonjë organizim shoqëror, por edhe në jetën e tyre të përditshme. Zinxhirët e ndryshëm si të fytit, dorës, figura dhe lëkura të ndryshme janë ato pjesë të bizhuterisë që në të shumtën e rasteve i mbajnë të rinjtë tanë.

Albulena Shabani thotë se në të shumtën e kohës preferon aksesorët e ndryshëm, ngase ato në kohët e fundit edhe kanë hyrë në trend të modës. “Zakonisht preferoj të mbaj bizhuteri kur organizojmë ndonjë ndejë apo mbrëmje me shoqërinë time të ngushtë, ngase mendoj se dukem më bukur”, thotë ajo.

Sipas saj, mbajtja e zinxhirëve, figurave të ndryshme në dorë e fyt, në këtë kohë është bërë e pashmangshme e sidomos nga të rinjtë të cilët edhe i preferojnë në masë të konsiderueshme këto lloje stolish atraktive. Ajo thotë se mbajtja e këtyre stolive te ne ka ardhur edhe si pasojë e një bote krejt ndryshe, ngase të rinjtë në të shumtën e kohës i bartin këto duke imituar idhullit e tyre.

Në masë të konsiderueshme këto stoli të bizhuterisë i pëlqejnë edhe të riut Ardian Jasharit, i cili thotë se zakonisht në stinët më të ngrohta i bart me shumë pasion.

“Në stinën e verës dhe të pranverës, bizhuteritë i preferoj më shumë, ngase më duket se dukem më ‘cool’ dhe në hap me kohën. Jeta e rinisë i ka dëshirat dhe pasionet e veta. Edhe ne sikur moshatarët tanë perëndimorë mundohemi maksimalisht që të jemi në trend dhe të dukemi si ata. I pëlqej në masë të madhe figurat e ndryshme për fyt, por edhe preferojë t’i mbaj edhe në dorë, edhe pse disa njerëz ndoshta na keqkuptojnë dhe na quajnë mendjemëdhenj. Por unë i mbaj ngase më pëlqejnë dhe asgjë më shumë”, shton ai. Ardiani posedon një varëse qafe prej shumë vjetësh të cilën ia ka dhuruar vëllai nga Austria.

“Gjësendet apo thënë më mirë aksesorët preferoj t’i ruaj dhe mos t’i dëmtoj. Ka shumë vjet që mbajë qaforen prej argjendi të cilën e kam dhuratë nga vëllai”, tha ai.

Po ashtu edhe Shqipe Fazliu si shumë të reja të tjera është e dhënë pas aksesorëve. Ora që posedon ajo është shumë e çmuar për të, pasi atë e ka dhuratë nga mami prej më së 10 vjetësh. “E kam orën e dorës prej shumë vjetësh dhe është gjësendi më i çmuar për mua. Kjo është dhurata më e bukur që kam marr ndonjëherë dhe kjo është dhuratë nga mami. Më pëlqejnë aksesorët kualitativë që qëndrojnë me vite të tëra”, përfundoi ajo.