&

Zhvillime të rrufeshme dhe të papritura kanë ndodhur natën e së mërkurës në Partinë Demokratike të Kosovës.

Kryesia e PDK-së është mbledhur në një takim të jashtëzakonshëm në mesnatë për të shqyrtuar gjendjen në parti, pas një sondazhi të fundit të opinionit që tregon për rënie të besimit të qytetarëve si ndaj PDK-së ashtu edhe ndaj Qeverisë në përgjithësi.

Mbledhja është hapur nga kryeministri dhe kryetari i PDK-së, Hashim Thaçi, i cili ka kërkuar përgjegjësi nga anëtarët e kryesisë për këtë rënie drastike të besimit të qytetarëve ndaj PDK-së dhe Qeverisë. Pas fjalimit të tij, që ka zgjatur afër një orë Thaçi ka hapur debatin, i cili është përshkruar me tone të ashpra dhe me akuza të ndërsjella midis anëtarëve të Kryesisë të cilët ia kanë hedhur fajin njëri-tjetrin për rritjen e pakënaqësisë së qytetarëve.

Rreth orës dy pas mesnatës, kryeministri Thaçi ka hapur dritaren për të freskuar sallën ndërsa ka porositur kafe për t’i relaksuar anëtarët e kryesisë, pas tensioneve të krijuar në sallë. Pas një pauze të shkurtë fjalën e ka marrë kryetari i Kuvendit të Kosovës, njëherë sekretari i përgjithshëm i PDK-së, Jakup Krasniqi, i cili ka kritikuar një pjesë të ministrave dhe deputetëve të kësaj partie se nuk kanë punuar mirë dhe se kanë pasur paraqitje të dobët mediale, dhe si rezultat i kësaj, ai tha se është edhe kjo rritje e pakënaqësisë së qytetarëve ndaj qeverisë por edhe PDK-së. Pas tij, fjalën e ka marrë nënkyetari i PDK-së, Hajredin Kuqi, i cili ka folur për sukseset e mëdha të qeverisë Thaçi. Por ai është ndërprerë nga fundi i sallës, nga një vijë më e ashpër e anëtarëve të Kryesisë, të cilat kanë kërkuar përgjegjësi për këtë rënie të besimit dhe jo, siç u shprehen ata, ligjërata të kota si para studentëve të juridikut.

Për të zbutur tensionet fjalën e ka marrë sërish kryeparlamentari Krasniqi i cili përmes një barsolete ka arritur t'i relaksojë raportet midis anëtarëve të Kryesisë. Pastaj ka nisur një debat i gjatë dhe aspak i lehtë dhe në fund të tij është konkluduar se faji për këtë rënie të besimit qëndron te zyra e informacionit dhe komunikimit me publikun, si në Qeveri ashtu edhe në parti. Sipas tyre, këto zyra kanë dështuar të komunikojnë në mënyrë të duhur me opinionin dhe i kanë lënë hapësirë opozitës që të depërtojë. Si pasojë, opinioni në Kosovë në vend se ta besonte suksesin e jashtëzakonshëm të qeverisë, po iu beson akuzave të opozitës dhe ndërkombëtarëve për qeverisje të dobët dhe shkallë të lartë të korrupsionit. Menjëherë, nga fundi i sallës, janë kërkuar ndërrime në departamentet e informacionit, kërkesë kjo e cila ka marrë edhe mbështetjen e drejtuesve më të lartë të partisë, të ulur në krye të sallës. Pas ndryshimeve në qeveri, partia ka mbetur pa zëdhënës pasi ai është emëruar ministër dhe tani para nesh shtrohet nevoja urgjente për ta plotësuar sa më shpejt këtë pozitë të rëndësishme për partinë, kërkoi një nga anëtarët e Kryesisë.

Keni ndonjë propozim për zëdhënës të ri, që mbulon edhe aktiivtetet e qeverisë por edhe ato të partisë?, pyeti kreu i PDK-së.

"Berat Buzhala", dëgjohet një zë gjysëm i shterrur nga mesi i sallës. "Ka pasë komente të mira për shefin, plus e merre me veti edhe Ilirin (Mirenen v.j)". Propozim nuk gjenë mbështetje dhe kryeministri kërkon propozime tjera. "Baton Haxhiu", ishte propozimi i radhës, por që pak kush e pëlqeu si ide. As Dukagjin Gorani nuk e kishte përkrahjen e nevojshme për faktin se "diçka po pështjell shumë me projekte me t'huajt edhe me emisionin e Anës n' RTK".

Anëtarët e Kryesisë, që zakonish preferojnë të ulen afër dritareve për t'ia lëshuar herë pas herë një sy edhe Sheshit, këmbëngulnin që zëdhënësi i ri të jetë dikush që flet mirë gjuhën letërare, që ju ofrohet sado pak atyre që kanë mbaruar Fakultetin e Gjuhës dhe Letërsisë Shqipe e që janë nga Krusha e Rahovecit, të cilët është vështirë t'i dallosh në janë prej Kosovës apo Shqipërisë.

"Rrahman Paqarizi shef, gjuhën e flet akull, plus i përdorë edhe ata n'RTK për me përhapë çdo informatë që dojmë". Propozimi iu pëlqeu shumë të gjithëve, por në momentin e fundit ndërhyri kryeparlamentari Krasniqi, i cili tha se mund të kenë telashe me ndërkombëtarët dhe Raportin e Progresit të Komisionit Evropian, të cilët mund t'i akuzojnë për ndërhyrje në RTK.

Kë ta gjejmë tjetër?, ka pyetur Thaçi.

"Mufail Limanin. Na ka zbardhë ftyrën në debatet e Klan Kosovës". Propozimi ishte surprizë për të gjithë.

"Mufa, gitaristi i Minatorit", u pajtuan të gjithë njëzëri. "Është i vetmi që mund t'i amortizojë me sukses të gjitha akuzat e opozitës dhe analistëve. Para tij, të gjithë bëhen të pavlerë e të parëndësishëm ndërsa akuzat ndaj nesh duken qesharake dhe të pabesueshme".

Sipas tyre, Mufa e ka mbrojtur PDK-në me sukses nga demonizimi që i kanosej asaj nga akuzat e Isa Mustafës ndërsa Qeverinë e ka mbrojtur, po ashtu me sukses, nga akuzat e analistëve aniqeveritarë Beqë Cufajt, Enver Robellit, Avni Zogianit e Ilir Dedës, të cilat kanë arritur me shkrimet e tyre ta ulin besimin e qytetarëve ndaj qeverisë.

Pas përfundimit me sukses të mbledhjes, të gjithë kanë hequr kollarët, kanë zbërthyer dy pullat e sipërme të këmishës dhe kanë zbritur poshtë n'Zanzi Bar për të çuar nga një birrë të ftohtë me kikirika taze ndërsa kanë dëgjuar hitin e grupit 'Minatori'- Mihane loqka jem.

P.S.

Çdo ngjashmëri me 1 prillin është e qëllimshme