"Liga Kombëtare", "Superliga mbarëkombëtare", "Liga e përbashkët". Këto ishin vetëm disa nga epitetet që ju dhanë dy ligave (të bashkuara) të futbollit, të Shqipërisë e Kosovës. 

Në vitin 2005, e nisën Tifozat Kuq e Zi, me një paraqitje në qendër të Prishtinës, dhe me një tabelë të improvizuar ku ishin të renditura disa nga ekipet më me emër në Shqipëri e Kosovë, për t′u mbyllur me kaq. Pak vite më vonë ishin një numër i mediave qoftë të shkruara apo vizive, që shfaqën dhe ballafaquan idetë PRO dhe KUNDËR. 

E vërteta është se u fol shumë, u tha shumë, por askush nuk morri mundimin të shkruaj një plan, të jap një projekt, se si duhet të arrihet ky qëllim. Idetë, mbetën thjeshtë kronikë mediash, dhe u lanë në heshtje anipse kurrë nuk u shuan në mendjen e atyre që mendojnë për të mirën e futbollit shqiptar!

Hiç anën patriotike, nëse duam ekipe të forta, edhe konkuruese në tregun ballkanas dhe europian, atëherë ideja më e shpejtë për ta arrirë këtë është që të kemi një ligë të parbashkët. Të gjithë ne, në mënyra të ndryshme, kemi imagjinuar shpesh takimet, kur Prishtina do të luante me Flamurtarin e Vlorës, Trepça me Tiranën, Drita me Teutën, Vëllaznimi me Dinamon ... por fatkeqësisht këto kanë mbetur vetëm ëndërra. 

Jemi dëshmitarë të ekipeve shqiptare nëpër kualifikime në Ligën e Kampionëve, dhe Europaligë, që në rrethin e dytë të ndeshjeve, gjithçka mbaron . Në anën tjetër futbolli i Kosovës, ka më shumë ekipe sesa që ka kualitete, sesa që ka kushte elementare (siç jane stadiumet, zhveshtoret), dhe kur krejt kësaj i shtohet edhe izolimi ndërkombëtar, atëherë Liga e Bashkuar, do ishte mënyra ideale për të çarë izolimin. 

Për sa i përket futbollistëve, tregu i tyre do të ishte skajshmërisht konkurues, që do të thotë futbollistët do të kishin një sprovë për t′u bërë pjesë e e formacionit titullar në ekipet e lartpërmendura. Vetëm ekipet serioze, me traditë dhe financiarisht të forta, do të kishin mundësinë për të bërë gara, në këto nivele! Dhe, përparësi  e madhe për futbollistët do të ishte që djersa e tyre, dhe mundi i tyre do të shpërblehej. 

Plisat (Prishtina), Tirona Fanatics (Tirana), Flota Kuqezi (Flamurtari), Ujqërit e dëborës (Skenderbeu), Intelektualët(Drita), Kuqezinjtë e Jakovës (Vëllaznimi), do të përkujdeseshin për ′ngrohjen′ e tribunave, dhe mbushjen e stadiumeve, gjë që në dekadën e fundit e kemi vuajtur shumë. Dy federatat respektive që do duhej ti jepnin shtysë më të madhe kësaj ideje, sikur s’duan ta prishin rehatinë që kanë, dhe përgjumjen që i ka kapluar. Për ta është thjeshtë një ide e mirë, dhe këtu përfundon gjthçka! 

Nuk duhet të presim që dy presidentët nëse janë të gatshëm ta përkrahin këtë ide ose JO, por janë klubet ′katalizatorët′ që do nxitnin , për një projekt të tillë. Të drejtat televizive do të kenë çmimin rekord, për të drejta televizive të shitura ndonjëherë në hapsirën gjithëshqiptare. 
Deri sa të jetë arrirë kjo, dy opcione: të vetknaqemi, me rrethin e dytë të ciklit eliminatorë dhe me izolimin e futbollit të Kosovës, apo të kemi respekt në futbollin evropian, e pse jo edhe të lëmë gjurmë atje!