Atletico Madrid: Nuk kemi nisur bisedimet për James Rodriguez
Presidenti i Atletico Madridit, Enrique Cerezo ka konfirmuar se janë të interesuar në objektivin e Napolit, James Rodriguez, por ka pranuar se nuk i kanë nisur bisedimet me Real Madridin.
Reprezentuesi kolumbian është rikthyer në Madrid pas huazimit dy-vjeçar te Bayern Munich, por ai nuk është pjesë e planeve të trajnerit Zinedine Zidane, shkruan Zëri.info.
Presidenti i Napolit, Aurelio De Laurentiis dëshiron transferimin e James fillimisht në formë të huazimit, duke refuzuar të paguajë 42 milionë euro.
Atletico Madridi gjithashtu ka shprehur interesim për futbollistin, por Cerezo ka thënë se ende nuk i kanë nisur bisedimet.
“Atletico Madridi është gjithnjë e interesuar për lojtarë të mëdhenj dhe James Rodriguez është lojtar i madh, por ne nuk kemi kontaktuar me Real Madridin për të”, tha Cerezo.
“Natyrisht, lojtarët e mëdhenj i interesojnë të gjithëve, gjithashtu edhe ne”, shtoi ai./Zëri.info