Qeveria e ardhshme pritet ta përmbyll dialogun, Veseli thotë se Kosova s’duhet t’i frikësohet ballafaqimit me Serbinë
Tema e dialogut është konsideruar si shumë e rëndësishme për përfaqësuesit e partive politike në vend.
Ata thonë se për përmbylljen e këtij procesi duhet të krijohet një qeveri stabile dhe e gjerë.
Por, ka edhe të tillë që thonë se asnjë forcë politike vendore nuk mund ta përmbyll procesin e dialogut, pasi këtë mund ta bëjë vetëm Uashingtoni dhe Brukseli.
Lideri i PDK-së, Kadri Veseli ka thënë se Kosovës i duhet një qeveri e cila nuk i frikësohet ballafaqimit me Serbinë. “Kosova e UÇK-së është e çlirimtarëve e popullit të Kosovës, duhet të ballafaqohemi jo me ik prej tyre. Këta që kalkulojnë sot nuk munden”, ka deklaruar Veseli për rtv 21.
Shefi i grupit parlamentar të LDK-së, Avdullah Hoti ka thënë se është e nevojshme që vendi të ketë një qeveri stabile dhe jo të përsëriten gabimet që kanë ndodhur gjatë këtyre dy viteve.
Ndërsa, lideri i AAK-së, Ramush Haradinaj deklaroi se dialogun duhet ta udhëheqin ata që kanë qëndrueshmëri për mbrojtjen e interesave të vendit dhe të cilët të gatshëm me pranu sakrifica.
Sipas deputetit të Vetëvendosjes, Rexhep Selimi për vendimet e mëdha duhet një shumicë e konsoliduar. Ai shtoi se një qeverisje teknike nuk mund ta bëj një gjë të tillë.
