Bahtiri thotë se Isa Mustafa po e bllokon marrëveshjen me VV-në

Bahtiri thotë se Isa Mustafa po e bllokon marrëveshjen me VV-në

Aktuale January 27, 2020 - 22:41
Bahtiri ia hedh fajin Isa Mustafës

Kryetari i Mitrovicës dhe zyrtari i Vetëvendosjes, Agim Bahtiri ka thënë se çështja e kryetarit të Parlamentit është çështje e mbyllur.

Bahtiri, në një linjë telefonike për “Debat Plus” në RTV Dukagjini ka thënë se LDK-së i kanë ofruar kryetarin e Kuvendit por këta të fundit kanë dashur Presidentin.

Ai ka thënë se me 26 dhjetor madje propozuan që ata të bëjnë propozimin e një anëtari të LDK-së në krye të Kuvendit por përsëri LDK nuk deshi dhe shkuan me kandidatin e tyre.

Bahtiri ka thënë se Vetëvendosje për shkak të parimeve nuk bën Pazar me një pozitë siç është Kryetari i Kuvendit.

“I kam thënë personalisht edhe Agim Veliut se mbi këtë post nuk kalon asgjë. Gjithçka mund të diskutohet por posti i Kryeparlamentarit ka përfunduar njëherë e përgjithmonë”.

Zyrtari i Vetëvendosjes ka thënë se kjo parti është e hapur për të diskutuar për të mirën e Kosovës, por sipas tij kjo parti nuk do të shkel mbi parimet e saja, përcjell Telegrafi.

Bahtiri thotë se ajo çfarë po kërkon LDK-ja është e pa realizueshme dhe sipas tij Vetëvendosje “s’ka ku të shkojë më”.

“Largimi i Glauk Konjufcës do të ishte poshtërim për Vetëvendosjen dhe vet institucionin e Kuvendit”.

I pari i Mitrovicës ka thënë se Isa Mustafa është bllokues i marrëveshjes me Vetëvendosjen.

“Jo Agim Veliu por Isa Mustafa është bllokues i marrëveshjes”.

Bahtiri thotë se LDK-ja qysh kur ka kërkuar Ministrinë e Punëve të Brendshme ka treguar se nuk është e interesuar për marrëveshje.

Zyrtari i Vetëvendosjes thotë se stërzgjatjen e bisedimeve dikush do ta paguajë por sipas tij jo LVV pasi që sipas tij ata kanë bërë lëshime të vazhdueshme.