Mërgim Lushtaku ka disa fjalë për kryeministrin Kurti
Qeveria Kosovës në detyrë nesër pritet që të largojë tërësisht taksën 100 përqind ndaj mallrave nga Serbia dhe Bosnje Hercegovina për të zëvendësuar me masat e reciprocitetit.
Lajmin e ka konfirmuar zëvendëskryeministri në detyrë, Haki Abazi, i cili shkurt u shpreh se janë duke punuar në këtë drejtim, derisa thekson se në mbrëmje do të ketë njoftim zyrtar.
Por skeptik për masat e reciprocitetit u shpreh deputeti Mërgim Lushtaku, djali i Sami Lushtakut.
Ai thotë se menaxhimi i reciprocitetit ndaj Serbisë do të jetë i vështirë. Sipas deputetit të PDK-së, qeverisë në detyrë i ka humbur edhe legjitimiteti për vendime të tilla.
“S’ka fare legjitimitet se Kuvendi e ka thënë të kundërtën rreth mbi 82 vota kanë qenë kundër kësaj qeverie. Besoj që pavarësisht se kanë marrë një vendim. E ai vendim hynë në fuqi në mënyrë të shkallëzuar qysh e kanë propozuar. Më mirë kishte qenë me heq taksën nga fillimi se me bërë lojë politike… Ka me qenë edhe më e vështirë menaxhimi i reciprocitetit, mendoj se nuk kemi ende një produkt se cili do të jetë reciprociteti në përmbajte”, thotë ai.
Taksën 100 përqind e kishte vendosur Qeveria e kaluar e Kosovës, e ish-kryeministrit Ramush Haradinaj, në nëntor të vitit 2018.
Derisa kryeministri në detyrë tashmë, Albin Kurti më 20 mars të këtij viti ka larguar taksën për lëndën e parë ndaj Serbisë dhe Bosnjës. Kurse ka premtuar se më 1 prill të vitit 2020 do të largohet tërësisht për t’u zëvendësuar me masa të reciprocitetit.