Infektuar: 56118
Shëruar: 49432
Vdekur: 1411
O’Brien dhe Grenell, nikoqirë të takimit në Shtëpinë e Bardhë

O’Brien dhe Grenell, nikoqirë të takimit në Shtëpinë e Bardhë

Aktuale August 14, 2020 - 13:24

Nikoqirë të takimit të 2 shtatorit në Shtëpinë e Bardhë, ku do të takohen liderët e Kosovës dhe të Serbisë, do të jenë: Këshilltari për siguri kombëtare Robert O’Brien dhe i dërguari i presidentit amerikan për dialogun, Richard Grenell.

Kështu bëri të ditur për radion “Evropa e Lirë” një zyrtar i lartë i administratës amerikane.

“Shtetet e Bashkuara mezi presin këto diskutime të rëndësishme ndërmjet kryeministrit Hoti dhe presidentit Vuçiq. SHBA-ja beson se përparimi në çështjet ekonomike është kyç në avancimin e procesit të paqes”, tha ky zyrtar për REL-in.

Të premten Grenelli bëri të ditur se udhëheqësit e dy vendeve do të takohen në Shtëpinë e Bardhë për bisedime më 2 shtator.

Kryeministri i Kosovës Avdullah Hoti dhe presidenti i Serbisë Aleksandar Vuçiq kanë konfirmuar se i janë përgjigjur pozitivisht ftesës së Grenellit për takim në Shtëpi të Bardhë, më 2 shtator.

Të dy liderët kanë thënë se në këtë takim do të bisedohet për çështje ekonomike.

Ky është takimi i dytë i thirrur nga Grenelli.

I pari, i planifikuar për 27 qershor, ishte anuluar pak ditë para mbajtjes, meqë Zyra e Prokurorit të Specializuar me seli në Hagë kishte deklaruar se ka paraqitur një aktakuzë për krime lufte ndaj presidentit të Kosovës Hashim Thaçit, i cili ishte i ftuar në takimin e Uashingtonit.

Megjithatë, dialogu mes këtyre dy shteteve ka rinisur më 16 korrik në Bruksel.

Ky proces, që ndërmjetësohet nga pala evropiane, ka nisur më 2011-n.

Ai ishte bllokuar nga nëntori i vitit 2018, pasi autoritetet e Kosovës patën vënë taksë në mallrat serbe. /REL