Haradinaj kujton lirimin e tij nga Haga, beson në pafajësinë edhe të bashkëluftëtarëve
Kreu i AAK-së, Ramush Haradinaj ka kujtuar lirimin e tij nga Tribunali Penal Ndërkombëtar i Hagës për krimet në ish-Jugosllavi.
Përmes një postimi në “Facebook” Haradinaj ka thënë se para tetë vitësh u dëshmuar për herë të dytë pastërtia e luftës së UÇK-së.
“Tetë vite më parë u dëshmua për të dytën herë pastërtia e luftës së UÇK-së, e imja dhe bashkëluftëtarëve të mi”, ka shkruar Haradinaj.
Ai thotë se beson në pafajësinë edhe te ish-bashkëluftëtarëve të tij që aktualisht gjenden në paraburgimin e Gjykatës Speciale.
“Populli i Kosovës pas gati një shekull dhune sistematike, kapi pushkët në mbrojtje të jetës dhe tokës së tij. Pastërtia e luftës së UÇK-së, mori përkrahjen e mbarë botës demokratike në krye me NATO-n. Andaj, besoj në pafajësinë edhe të bashkëluftëtarëve që sot përballen me sfidën e radhës në Hagë. Ata shkuan si çlirimtarë atje, ashtu do të kthehen. Historia shkruhet vetëm një herë!”, tha ai./Zëri