Mësim online në shkollat që shërbejnë si qendra votimi, Jashari: Zgjidhje e duhur

Mësim online në shkollat që shërbejnë si qendra votimi, Jashari: Zgjidhje e duhur

Aktuale October 14, 2021 - 15:17

Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, në një prononcim për Ekonominë Online ka thënë se shkollat që do të shërbejnë si qendër votimi më 18 tetor do të zhvillojnë mësimin online, ndërsa ato që nuk shërbejnë do të mbahet mësimi i rregullt.

Rrahmanaj tha se kështu është njoftuar pas komunikimit që ka pasur me ministren e Arsimit, Shkencës, Teknologjisë dhe Inovacionit, Arbërie Nagavci.

“Edhe ne përkrahim idenë e Asociacionit të Komunave të Kosovës, duke ditur arsyetimin e tyre se kjo po bëhet pasi ka frikë se mos po na mbetet COVID-i brenda shkollës, ideja e tyre ishte që të nesërmen të mos fillohet dhe ajo ditë të mos përdoret për pushim, por që institucionet brenda shkollave të kujdesen, mirëpo pastaj Ministrja doli dhe komunikuam me të dje dhe ajo e sqaroi se në shkollat ku nuk do të ketë zgjedhje do të mbahet mësimi i rregullt, ndërsa në shkollat që janë përzgjedhura nga KQZ-ja për t’u votuar, atëherë nxënësit dhe mësimdhënësit do të jenë në shtëpi, mirëpo nuk do të jetë ditë e humbur e mësimit, por do të mbajnë mësim online”.

Duke pasur parasysh edhe situatën me COVID-19, ai pohon se kjo është zgjedhja më e duhur, pasi që sipas tij nuk është mirëseardhur humbja e mësimit.

“Duke e ditur që kemi shumë ditë të humbura, jemi pajtuar dje me ministren që ashtu edhe të ndodhë, pra SBASHK-u pajtohet që në shkollat ku votohet, mësimi të zhvillohet online, ndërsa në shkollat që nuk janë paraparë për të qenë qendra të votimit të mbahet mësimi i zakonshëm”.

“Ne jemi pajtuar pas arsyetimit të ministres, sepse janë shumë ditë të humbura dhe nëse ia shtojmë edhe një ditë, do të kemi pastaj shumë telashe shtesë”.