Paralajmërime për sulm të mundshëm në qendrat tregtare në periferi të Prishtinës dhe në Ferizaj

Paralajmërime për sulm të mundshëm në qendrat tregtare në periferi të Prishtinës dhe në Ferizaj

Aktuale November 27, 2021 - 21:01

Stafi i diplomacive ndërkombëtare në Kosovë është paralajmëruar që të shmang qendrat e mëdha tregtare në Kosovë për shkak të informacioneve të pranuara për një sulm të mundshëm ekstremist.

Në bazë të njoftimit të siguruar nga “Zëri” thuhet se koha e mundshme e sulmit është deri më 30 nëntor.

“Është marrë informacion se një ekstremist, që quhen si "ujk i vetmuar", mund të planifikojë një sulm në një nga qendrat tregtare. Koha e mundshme është deri më 30 nëntor. Policia lokale është duke e vëzhguar të dyshuarin. Për të qenë të sigurt, të gjithë anëtarët e misionit këshillohen që të shmangin zonat e mëdha tregtare, veçanërisht qendrën tregtare Albi dhe qendrat tregtare në Ferizaj”, thuhet në lajmërimin që i është dërguar stafit të një prej përfaqësive diplomatike në vendin tonë.

Zëri ka kontaktuar edhe me Policinë e Kosovës lidhur me këtë rast. Nga Policia kanë thënë se varësisht nga natyra e informacionit dhe rezultimit të të gjeturave, ndërmerren veprimet operacionale.

“Policia e Kosovës është institucion i zbatimit të ligjit dhe konform autorizimeve ligjore që ka trajton ç'do informacion apo çështje e cila ndërlidhet me fushëveprimin policorë.Varësisht nga natyra e informacionit dhe rezultimit të të gjeturave, ndërmerr veprimet e saja operacionale në bashkëpunim dhe koordinim me organet e drejtësisë, në interes të ruajtjes së rendit dhe sigurisë publike në vend”, thuhet në përgjigjen e Policisë./Zëri