Kosova, në vendin e 140-të nga 142 vende për forcën ushtarake
Sipas raportit vjetor “Global Firepower”, i cili vlerëson fuqinë ushtarake të secilit shtet, Kosova është në vendin e 140-të, nga 142 shtete që janë marrë në konsideratë.
Raporti vjetor vlerëson vendet, duke filluar nga diversiteti i armëve dhe fuqia punëtore e disponueshme, te vendndodhja gjeografike dhe fuqia financiare për të përcaktuar se cilat kombe dominojnë botën për sa i përket fuqisë ushtarake, shkruan Zeri.info.
Gjatë vlerësimit janë përdorur më shumë se 50 faktorë.
Kosova është vlerësuar me rezultat 13.9136 (rezultati 0.0000 konsiderohet ‘perfekt’), ndërsa thuhet se ushtria e saj ka tendenca për rritje.
E para në renditje është SHBA-ja, e ndjekur nga Rusia, Kina dhe India, ndërsa në top 10 janë edhe Japonia, Koreja e Jugut, Franca, Britania e Madhe, Pakistani dhe Brazili.
Turqia dhe Irani janë pozicionuar në vendin e 13-të, përkatësisht të 14-të, kurse Gjermania në të 16-tin.
E Ukraina, për dallim nga Rusia, që gjendet në vendin e 2-të, e me të cilën është në luftë që nga muaji shkurt i këtij viti, renditet 20 vende më poshtë (22).
Sipas këtij raporti, del se Serbia ka forcën më të madhe ushtarake në rajon – ajo është në vendin e 61-të dhe është vlerësuar se ka tendencë për rritje të fuqisë ushtarake.
Menjëherë pas Serbisë është Kroacia, e cila është në vendin e 62-të dhe Bullgaria në vendin e 67-të.
Forcat Ushtarake të Shqipërisë janë në vendin e 115-të.
Mali i Zi është në vendin e 132-të e Maqedonia e Veriut në vendin e 135-të. /Zëri
