Këshilli i Prindërve: Pagat duhet t’u jepen mësimdhënësve

Këshilli i Prindërve: Pagat duhet t’u jepen mësimdhënësve

Aktuale October 03, 2022 - 15:15

Këshilli i Prindërve i Kosovës, përmes një postimi në Facebook, i bëri thirrje Qeverisë që të ekzekutohen pagat për nxënës.

Në reagimin e Këshillit thuhet edhe se grevat në arsimin e obligueshëm duhet të rregullohen me ligj dhe jo, siç u shprehën ata, me forma të tjera “disiplinimi”.

“Si Këshill i Prindërve kemi avokuar, arsyetuar dhe deklaruar gjithnjë në të drejtën kushtetuese dhe njerëzore të fëmijëve tanë për përkujdesje, edukim dhe arsimim publik të pamohueshëm nga askush. Kundërshtimi ynë kryesor ndërlidhet me të drejtën monopolizuese të SBASHK-ut për të ‘mbyllur’ e ‘hapur’ shkollat sipas vlerësimeve të pak individëve dhe në dëm të plotë ndaj fëmijëve e prindërve”, thuhet në postimin e tyre.

Tutje, ata thonë se nuk janë dakord që të krijohet një situatë edhe më e rëndë se vetë greva.

“Por, asnjëherë nuk jemi dakord që ne të krijojmë një situatë edhe më të rëndë (sesa vetë greva) dhe të gjithë ata mësimdhënës të ngelen pa paga për diçka që shteti i Kosovës e ka pranuar vazhdimisht të mirëqenë dhe asnjëherë nuk u është ndaluar paga. Grevat në arsimin e obligueshëm duhet të rregullohen me ligj dhe jo me forma të tjera ‘disiplinimi’. Andaj, si Këshill i Prindërve i Kosovës u bëjmë thirrje institucioneve të Qeverisë së Kosovës të bëjnë ekzekutimin e plotë të pagave të mësimdhënësve pa vonesë. Nëse nuk mund ta bëni më mirë arsimin, së paku mos e bëni më keq”, thuhet tutje në postim.