Djegia e veturave në veri, Abbotti: Duhen hetime të shpejta, këto akte rrezikojnë stabilitetin

Edhe ambasadori britanik Nicholas Abbott u është bashkuar ambasadorëve të tjerë që dënuan djegien e veturave me targa RKS në veri të vendit.

Ai tha se aktet e tilla paraqesin rrezik për stabilitetin në vend dhe se ato duhet dënuar nga politikanët.

“Djegia e veturave pas riregjistrimit në targa RKS në veri të Kosovës është e papranueshme. Të gjithë akterët seriozë politikë duhet t’i dënojnë këto akte dhune dhe rreziqet që ato paraqesin për stabilitetin dhe qetësinë. Hetimet e shpejta për këtë kriminalitet janë të nevojshme dhe duhet të kryhen me ndjeshmëri dhe seriozitet”.

Edhe ambasadori i Gjermanisë në Kosovë, Jorn Rohde, më herët tha se dhuna nuk është opsion.

The burning of vehicles following re-registration to RKS plates in north Kosovo is unacceptable. All serious political actors should condemn these acts of violence and the risks they pose to stability and calm. 1/

— Nicholas Abbott (@nickabbottfcdo) March 31, 2023

“Unë kam besim të plotë që autoritetet kosovare do të hetojnë rastet plotësisht dhe do të sjellin përgjegjësit para drejtësisë”, shkroi diplomati gjerman.

Edhe shefi i Zyrës së BE-së, Tomas Szunyog, ka reaguar ashpër pas djegies së pesë veturave me targa RKS në veri të Republikës së Kosovës.

“Dënojmë ashpër djegien e automjeteve të riregjistruara së fundmi në targa të Kosovës në veri të Kosovës. Shkatërrimi i pronës private, që ka ndodhur gjatë dy ditëve të fundit, me qëllim të frikësimit të popullatës lokale, është i mjerueshëm, i papranueshëm dhe duhet dënuar nga të gjithë aktorët përkatës”, shkroi Szunyuogu. /Express