Agim Veliu kërkon publikisht të përfshihet në listën e LDK-së për deputetë

Ish-ministri dhe një nga figurat më të vjetra të LDK-së, Agim Veliu, ka reaguar pas debatit të ditëve të fundit brenda partisë lidhur me përfaqësimin në listën zgjedhore për zgjedhjet e 28 dhjetorit.

Në një postim drejtuar “qëndrestarëve, anëtarëve dhe simpatizantëve”, Veliu u shpreh mirënjohës për mbështetjen dhe zërat që kanë kërkuar respektim të meritokracisë brenda LDK-së, duke theksuar se kontributi i tij dhe i shumë të tjerëve nuk mund të neglizhohet.

Sipas tij, pritjet që ai të ishte pjesë e listës kanë ekzistuar edhe në zgjedhjet e kaluara, por vendimet e padrejta të asaj kohe nuk e kanë larguar nga misioni i tij politik.

“Unë kam vazhduar të qëndroj aty ku kam qenë gjithmonë – në shërbim të LDK-së, qytetarëve dhe vlerave që kemi kultivuar për më shumë se tri dekada,” shkruan Veliu.

Ai nënvizon se përfshirja në listë nuk është privilegj personal, por përgjegjësi dhe vazhdimësi e një angazhimi të gjatë. Veliu e quajti LDK-në “shtëpi të përbashkët”, të ndërtuar me sakrificë e besnikëri nga njerëzit që qëndruan pranë saj në kohët më të vështira.

Në reagimin e tij, ai e vuri theksin te domosdoshmëria e respektimit të bazës, themeluesve dhe kontribuesve afatgjatë, duke shtuar se nuk mund të hapet dera për individë që nuk kanë qenë pjesë e LDK-së, nëse kjo nënkupton lënien jashtë të atyre që e kanë ndërtuar partinë për më shumë se 30 vite.

“Respekti për bazën nuk është vetëm parim – është detyrim moral dhe institucional,” tha ai.

Pavarësisht debateve, Veliu deklaroi se mbetet i përkushtuar ndaj vlerave të LDK-së dhe i gatshëm të japë kontributin e tij kudo që i kërkohet.

Në fund të mesazhit ai shprehu mirënjohje për mbështetjen e vazhdueshme dhe përfundoi me urimet:
“Zoti e bekoftë LDK-në! Zoti e bekoftë Rugovën! Zoti e bekoftë Kosovën!”