Pas reagimeve të shumta, Rusia e liron nga akuzat gazetarin Golunov

Pas reagimeve të shumta, Rusia e liron nga akuzat gazetarin Golunov

Bota qershor 11, 2019 - 16:43
Detajet

Ministria e Brendshme e Rusisë ka njoftuar se autoritetet e drejtësisë në këtë vend i kanë hedhur poshtë akuzat ndaj gazetarit Ivan Golunov dhe se ai do të lirohet edhe nga arresti shtëpiak. Golunov në të kaluarën është marrë me rastet e korrupsionit.

Vendimi i organeve ruse erdhi vetëm disa orë pasi avokatët e gazetarit dorëzuan ankesë ndaj lënies së tij në arrest shtëpiak për shkak të akuzave për drogë, të cilat vetë Golunovi i ka mohuar.

Avokati Sergei Badamshin tha të martën se e ka dorëzuar ankesën ndaj vendimit për arrest shtëpiak në Gjykatën e Qytetin në Moskë. Aktivistë, gazetarë dhe figura të tjera të njohura ruse u përgatitën për të marshuar rrugëve për ta kërkuar lirimin e tij.

Reporteri i njohur hetues, i cili punon për agjencinë e lajmeve “Meduza” me seli në Letoni, u arrestua më 6 qershor, duke nxitur reagime të shumta ndaj këtij rasti që nga kritikët u cilësua si akuzë e ngritur për motive politike.

Golunov u akuzua nga organet ruse të drejtësisë se ka bërë përpjekje të shesë drogë. Sidoqoftë, përkrahësit e tij besojnë se këto akuza janë hakmarrje e autoriteteve të Moskës për shkak të raportimeve të tij lidhur me korrupsionin në mesin e zyrtarëve shtetërorë, shkruan “Free Europe”, transmeton Gazeta Express.