Sfidohet politika e Presidentit Trump ndaj Iranit

Irani pretendon se ka shënuar fitore morale në përballjen me Shtetet e Bashkuara lidhur me programin bërthamor të Teheranit.

Presidenti iranian Hassan Rouhani tha të dielën se Uashingtoni nuk arriti të fitonte mbështetje ndërkombëtare për sanksione më të ashpra ndaj Teheranit për rritjen e prodhimit të uraniumit të pasuruar.

Ndërkohë, mediat britanike kanë botuar një tjetër kabllogram të ish-ambasadorit britanik në Shtetet e Bashkuara, ku ai thotë se Presidenti amerikan Donald Trump ishte tërhequr nga marrëveshja bërthamore ndërkombëtare me Iranin vetëm e vetëm për të fyer paraardhësin e tij Barak Obama.

Presidenti iranian Hassan Rouhani i tha një turme të gëzuar në qytetin verior të Shirvanit, të dielën se presioni i Shteteve të Bashkuara ndaj Teheranit ka dështuar.

“Gjatë 14 muajve të fundit, çfarëdo rruge që amerikanët ndoqën, sociale, politike, apo ligjore, ato çuan në humbje”.

Administrata Trump u ka bërë thirrje aleatëve që të mbështesin sanksionet shtesë kundër Teheranit pasi zyrtarët iranianë javën e kaluar njoftuan se kishin tejkaluar kufijtë e rezervave bërthamore të vendit të parashikuara në marrëveshjen ndërkombëtare të vitit 2015.

Administrata e Presidentit Trump e braktisi këtë marrëveshje vitin e kaluar dhe vendosi sanksione ekonomike ndaj Iranit.Teherani thotë se programi i pasurimit të uraniumit nuk shkel ligjet ndërkombëtare.

“Pasurimi i uraniumit nuk është i ndaluar në bazë të Marrëveshjes së Mospërhapjes së armëve bërthamore. Kjo është e drejta e çdo anëtari të Traktatit të Mospërhapjes së armëve bërthamore dhe është e drejtë e Iranit. Ajo që po bëjmë ne është transparente, nën mbikëqyrjen e Agjencisë Ndërkombëtare të Energjisë Atomike, dhe inspektorët e tyre janë atje. Çdo veprimtari është duke u monitoruar. Nuk kemi asgjë për të fshehur”, tha Kazem Gharib Abadi, i dërguari i Iranit në OKB dhe në organizatat e tjera ndërkombëtare.

Por, në përgjigje të sanksioneve paralizuese, Irani gjithashtu po përpiqet të bllokojë kalimin e cisternave të naftës përmes ujrave ndërkombëtare në Gjirin Persik. Javën e kaluar, tre anije iraniane u përpoqën të pengonin një anije britanike të transportit të naftës, por hoqën dorë pasi një anije tjetër britanike u hodh në mbrojtje të anijes cisternë.

“Ne po monitorojmë vazhdimisht sigurinë, dhe po vlerësojmë llojin e sigurisë për të cilin ne kemi nevojë për anijet britanike”, tha Jeremy Hunt, Sekretar i Jashtëm i Britanisë.

Zyrtarët amerikanë të mbrojtjes thonë se po shqyrtojnë mundësinë epërcjelljes ushtarake për anijet cisternë që kalojnë nëpër këtë zonë. Në një shfaqje force, Pentagoni të dielën publikoi pamjet e operacioneve të furnizimit për anijen luftarake Harpers Ferry, e cila së fundmi ui bashkua forcave amerikane në rajonin e Gjirit.

Tesnionet u shtuan edhe më tej të dielën pasi një media britanikepublikoi përmbajtjen e një kabllogrami që ambasadori britanik në Uashington Kim Darroch kishte dërguar në Londër, ku thoshte se Presidenti Trump e braktisi marrëveshjen bërthamore vetëm e vetëm për të fyer ish-Presidentin Barak Obama.

Zoti Darroch dha dorëheqjen javën e kaluar pas publikimit nga mediat të kabllogrameve diplomatike, në të cilat ai e përshkruante administratën e Presidentit Trump si të paaftë dhe jofunksionale. Në kabllogramet e sapo publikuara, ai e quante tërheqjen e e Presidentit Trump nga marrëveshja bërthamore me Iranin “vandalizëm diplomatik”. /VoA