Suedia mbyll hetimet për dhunim seksual kundër Julian Assange-s
Prokurorët suedezë i kanë ndërprerë hetimet për dhunim seksual kundër themeluesit të faqes WikiLeaks, Julian Assange.
Assange, i cili më parë i kishte mohuar akuzat për dhunim, e ka shmangur ekstradimin në Suedi për shtatë vjet pasi ishte strehuar në ambasadën e Ekuadorit në Londër në vitin 2012.
Australiani 48-vjeçar ishte nxjerrë nga kjo ambasadë nga policia britanike në muajin prill dhe ishte dënuar me 50 javë burgim për shkak të shkeljes së kushteve të dorëzanisë.
Ai aktualisht është duke u mbajtur në burgun “Belmarsh” në Londër.
Në deklaratën e prokurorisë suedeze thuhet: “Nënkryetarja e Prokurorisë Publike, Eva-Marie Persson, sot ka marrë vendim që t’i ndërpresë hetimet lidhur me Julian Assange-n”.
“Arsyeja për këtë vendim është që dëshmitë për këtë rast janë dobësuar në masë të konsiderueshme për shkak të periudhës së gjatë kohore që ka kaluar prej ngjarjes në fjalë”, thuhet më tej në deklaratë.
Prokurorët njoftuan se vendimi për mbylljen e hetimeve për këtë rast u mor pas intervistimit të shtatë dëshmitarëve, shkruan “BBC”, transmeton Gazeta Express.
