Spahn: Gjermania mund ta ketë një vaksinë për COVID-19 në muajt e ardhshëm

Ministri gjerman i Shëndetësisë, Jens Spahn, tha të enjten se ai pret që në muajt e ardhshëm ose përfundimisht vitin e ardhshëm (2021) të zbulohet një vaksinë ndaj COVID-19.

Më 12 gusht Agjencia e Shëndetit Publik në Gjermani fillimisht publikoi një raport, ku thoshte se në vjeshtë do të ketë një vaksinë por më pas dokumenti u fshi nga faqja e internetit e institutit “Robert Koch” (RKI).

Instituti tha se dokumenti nuk ishte i përditësuar dhe ishte botuar gabimisht, raporton “Reuters”.

"Unë jam optimist se në muajt e ardhshëm dhe sigurisht në vitin e ardhshëm mund të ketë një vaksinë", i tha Spahni televizionit gjerman ZDF.

Spahni nuk pranoi të caktojë një muaj specifik në të cilin vaksina do të ishte e gatshme, duke thënë se akoma nuk është e mundur të përcaktohej se sa shpesh njerëzit kanë nevojë të vaksinoheshin ose sa do të zgjaste imuniteti nga ajo vaksinë.

"Por, një gjë që mund të themi është se falë të gjithë neve që punojmë së bashku - studiuesve, shkencëtarëve, publikut - me siguri do të kemi një vaksinë më shpejt se kurrë më parë në historinë e njerëzimit", tha ministri gjerman.

Presidenti rus, Vladimir Putin, njoftoi të martën se Rusia ishte bërë vendi i parë që ka miratuar një vaksinë ndaj COVID-19.

Spahni përsëriti dyshimet e tij për atë vaksinë, të quajtur "Sputnik V", duke thënë se kishte relativisht pak të dhëna për të.

Të enjten në Gjermani janë regjistruar 1.445 raste të të infektuarve me koronavirusin e ri, duke e çuar numrin e përgjithshëm në 219.964.

Instituti “Robert Koch” (RKI) raportoi se janë shënuar edhe katër vdekje.

Deri më tani në Gjermani nga sëmundja COVID-19 kanë humbur jetën 9.211 persona. /REL