Një muaj pas 'katastrofës humanitare' në veri, dyqanet përplot me mallra të Serbisë
Foto: Laura Hasani

Një muaj pas 'katastrofës humanitare' në veri, dyqanet përplot me mallra të Serbisë

Ekonomia August 15, 2019 - 08:15
Detajet
Image

Meqenëse plani i serbëve të veriut dhe i shtetit të Serbisë për “katastrofë humanitare” në komunat veriore të Kosovës ka dështuar, pas vetëm dy ditësh dyqanet në atë pjesë të vendit janë stërmbushur me mallra nga Serbia. Vuçiqi ka pranuar se furnizimi ka shkuar nëpërmes kontrabandës, ndërkaq ministri serb i Tregtisë Rasim Lajiq ka numëruar dëmet që ka pësuar shteti serb për nëntë muaj të aplikimit të taksës në importin e produkteve serbe, shkruan gazeta "Zëri".

Para një muaji serbët e veriut të Kosovës nëpërmes Shoqatës së Afaristëve Serbë të Veriut, kryetarëve të komunave veriore, si dhe zyrtarëve të lartë të shtetit të Serbisë janë përpjekur ta realizojnë një skenar për “katastrofë humanitare” në komunat veriore, Mitrovicë e Veriut, Zveçan, Zubin Potok e Leposaviq, në përpjekje për ta bindur bashkësinë ndërkombëtare se si pasojë e vendosjes së taksës 100% në importin e produkteve serbe serbët e veriut kanë mbetur pa artikujt elementarë të jetesës, bukë, vaj, qumësht, sheqer e artikuj të tjerë. Madje Shoqata e Afaristëve kishte paralajmëruar një skenar, sipas të cilit “Serbia do të sillte në veri bukë, derisa për një bukë do të shtyheshin 40 veta”.

Të gjitha dyqanet, barnatoret, furrat, thertoret ishin urdhëruar t’i boshatisin ato nga mallrat që i posedonin, ndërkaq për dy ditë ata ishin urdhëruar edhe t’i mbanin të mbyllur. Pronarët serbë ishin urdhëruar madje që t’i mbyllin edhe lokalet hoteliere, qebaptoret, si dhe barnatoret me arsyetimin, siç shkruante në dyer të tyre “Të pamundësisë për t’u furnizuar me mallra nga Serbia”. Shoqata e Afaristëve kishte kërcënuar serbët dhe i kishte paralajmëruar që të mos blejnë mallra nga shqiptarët, as në jug të Mitrovicës e as të mos furnizohen me artikuj ushqimorë në dyqanet e shqiptarëve në “Lagjen e Boshnjakëve”.

Por vetëm dy ditë më pas duke parë se plani për ta bindur bashkësinë ndërkombëtare për krizë humanitare kishte dështuar, pronarët serbë u urdhëruan që t’i hapin të gjitha dyqanet, barnatoret dhe lokalet tjera, duke siguruar se “ata do të gjejnë mënyrë që të fusin në veri mallra nga Serbia”. Madje presidenti i Serbisë, Aleksandar Vuçiq, kishte thënë haptas se do të dërgojnë mallra të Serbisë në veri nëse do të jetë nevoja edhe nëpërmes ajrit. Për një kohë të shkurtër, të gjitha dyqanet në veri, depotë e ndryshme u mbushën me mallra nga Serbia. Një pjesë e mallrave ndodhej në dyqane, pasi serbët vetë i kishin larguar, por një pjesë tjetër filloi të hynte në veri nëpërmes të rrugëve ilegale.

Policia Kufitare dhe doganierët e Kosovës patën ndaluar disa kombi me mallra, por vetë policët kishin hasur në vështirësi, pasi kinse “populli i uritur” pengonte Policinë dhe në disa raste edhe i lironin kombit me mallra. “Ne kemi siguruar mallra serbe në dyqanet në Kosovë. Për këtë është dashur mund, ngase unë kam të bëj me njerëz, të cilët vetëm kritikojnë. Natyrisht se mallrat kemi arritur t’i fusim në Kosovë nëpërmes kontrabandës dhe tanimë dyqanet janë të mbushura me mallra nga Serbia”, ka deklaruar presidenti serb Aleksandar Vuçiq, të martën.

 Rreth 281 milionë euro më pak mallra nga Serbia në Kosovë

Në anën tjetër ministri serb i Tregtisë së Serbisë, Rasim Lajiq, ka vazhduar të vajtojë për dëmet që i bëhen shtetit të Serbisë nga taksa 100 për qind e vendosur në importin e produkteve serbe. “Nga nëntori i vitit të kaluar, nga momenti kur Prishtina vendosi taksën prej 100 për qind në produktet nga Serbia vazhdojnë vërejtjet, thirrjet, bindjet dhe konstatimet se ato janë të papranueshme”, ka thënë Lajiq për televizionin shtetëror serb RTS, ndërsa përcjell “Kossev” në veri. Sipas tij, nga atëherë është dërguar më pak mallra në Kosovë në vlerën rreth 281 milionë euro. “Nga 21 nëntori i vitit të kaluar deri më 8 gusht, do të thotë për 261 ditë, janë dërguar më pak mallra në Kosovë në vlerën prej 280.800.000 eurosh. Kjo do të thotë se në ditë dërgojmë më pak mallra në Kosovë për 1.075.000 euro, andaj ky është dëm i madh në kuptimin financiar për Serbinë. Në të gjithë po harrojmë se në periudhën e njëjtë kur nuk ka pasur taksë në Kosovë kemi eksportuar mallra në vlerë 440 milionë euro. Vlerësimet janë se këtë viti do të shkonte edhe në 500 milionë euro dhe kjo sigurisht se do të realizohej”, ka sqaruar Lajiq.

Lajiq: Taksa nuk hiqet shpejt

Ministri serb i Tregtisë është shprehur pesimist se taksa do të hiqet shpejt. Ai mendon se vetëm SHBA-ja dhe BE-ja mund të ndikojnë te Prishtina për ta hequr taksën. “Edhe ata që më përpara preferonin që taksa të suspendohej tani nuk mund të bëjnë asgjë. Vetëm SHBA-ja dhe BE-ja, askush tjetër nuk mund të ndikojë te Prishtina për ta hequr taksën, askush nuk ka arritur jashtë tyre që të ndikojnë të Prishtina, madje as Gjermania nuk ka mundur të bëjë asgjë. Pritjet që këtë ta bëjë CEFTA nuk kanë qenë reale”, thotë Lajiq.

Ai ka shtuar se ishte menduar që Serbia të marrë kundërmasa, por në këtë rast, sipas tij, do të pësonin serbët që jetojnë në Kosovë. “Është vështirë ta gjesh një masë, e cila do ta godiste vetëm një komunitet, por edhe nuk është mirë që të ndërmerren masa të motivuara etnikisht ndaj çdokujt. Mendoj se Serbia ka humbur ekonomikisht, por politikisht ka fituar”, ka thënë mes tjerash Rasim Lajiq, ministër i Tregtisë në qeverinë e Serbisë./ZËRI