Alarmante: Numër i madh i vetëvrasjeve në Kosovë
24 persona vetëm gjatë vitit të kaluar ia kanë marrë jetën vetes. Numër i lartë ishte edhe i atyre që tentuan ta bëjnë të njëjtën gjë. 74 persona sipas Policisë së Kosovë kanë tentuar të vetëvriten. Ky fenomen po shihet shqetësues nga sociologët dhe nga psikologët në vend, shkruan gazeta "Zëri".
Numri i vetëvrasjeve në vend po mbetet ende fenomen shqetësues në shoqërinë tonë. Pasojat e luftës që ende janë të pranishme në jetën e shumicës së njerëzve, shkalla e lartë e depresionit e shkaqe të ngjashme me këto po vlerësohet se janë shtytësit kyçë drejt këtij fenomeni fatkeq.
Dëshpërimi, sëmundja, vdekja e një personi të dashur, faji, si dhe papunësia janë disa nga arsyet, që sipas psikologëve çojnë deri te vetëvrasja e një individi. Sipas statistikave nga drejtoritë rajonale të Policisë së Kosovës, për vitin 2019 janë evidentuar gjithsej 24 vetëvrasje, si dhe 76 tentim vetëvrasje.
Policia: 24 persona u vetëvranë më 2019-n
Policia e Kosovës ka bërë të ditur për “Zërin” se gjatë vitit paraprak 24 persona kanë bërë vetëvrasje teksa 76 të tjera kanë tentuar ta bëjnë një gjë të tillë. Duke u bazuar në këto të dhëna qyteti i Prizrenit mbetet si qyteti me më shumë vetëvrasje, si dhe tentim vetëvrasje. “Ferizaj me 4 vetëvrasje dhe me 7 tentim vetëvrasje, Gjakova me 4 vetëvrasje dhe me 22 tentim vetëvrasje, Gjilani me 5 vetëvrasje dhe me 4 tentim vetëvrasje, në Mitrovicën e Veriut u shënua vetëm 1 vetëvrasje, në atë të Jugut, 1 vetëvrasje dhe 8 tentim vetëvrasje, në qytetin e Pejës nuk pati asnjë vetëvrasje teksa u raportuan 12 tentim vetëvrasje. Në kryeqytet po ashtu u shënuan 4 vetëvrasje dhe 23 tentim vetëvrasje, teksa Prizreni mbetet qyteti me më së shumti vetëvrasje, gjithsej 5, si dhe tentim vetëvrasje gjithsej 67”, ka njoftuar PK-ja.
Cilët faktorë po i çojnë kosovarët drejt vetëvrasjes?
Psikologia Fjolla Ibrahimi, në një prononcim për “Zërin” ka theksuar disa nga faktorët e simptomat që shtyjnë drejt vetëvrasjes. “Arsyeja pse një individ kryen vetëvrasje shpesh është e vështirë të përcaktohet, mirëpo nga shtysat madhore më të shpeshta janë: dëshpërimi, humbja e shpresës, sëmundja, papunësia, humbja e një marrëdhënie, vdekja e një personi të dashur, faji, zhgënjimet e ndryshme, të cilat personi që bënë vetëvrasjen ndonjëherë varet edhe nga marrëdhënia e vetëvrasësit me rrethin dhe shoqërinë”, ka thënë ajo.
Ajo gjithashtu ka treguar edhe simptomat paralajmëruese të kësaj sëmundjeje, ku stresi, shqetësimi emocional, të menduarit shumë, kërcënimi për ta lënduar veten janë ndër shkaqet që ndikojnë te një individ që të bëjë vetëvrasje. “Bërje kërcënimesh për ta lënduar ose për ta vrarë veten, kërkim mënyrash ose mjetesh për ta vrarë veten, të folur ose të shkruar rreth vdekjes, procesit të vdekjes ose vetëvrasjes janë shenja të rënda paralajmëruese që një njeri i shfaq, gjë që duhet kërkuar ndihmë në institucionet përkatëse. Ndërsa shenjat që paraqesin gjendje më pak urgjente janë: shprehjet e mungesës së shpresës dhe të humbjes së qëllimit për të jetuar, largim prej miqve, familjes ose prej shoqërisë, sjellje në mënyrë të pakujdesshme. Të gjitha këto janë shenja që paralajmërojnë një vetëvrasje, mirëpo jokushdo që përpiqet të kryejë vetëvrasje i lejon të tjerët ta dinë se çfarë ka ndërmend të bëjë, por shumica shfaqin shenja paralajmëruese të tilla si këto”, ka njoftuar psikologia.
Ibrahimi ka sqaruar edhe moshat të cilat prekën më së shumti nga kjo sëmundje e që janë grup-moshat e reja, gjë që është jashtëzakonisht shqetësuese. “Kohëve të fundit e shohim se ka një trend në rritje të vetëvrasjeve edhe në Kosovë dhe sidomos te grup-moshat e reja të shoqërisë, gjë që është jashtëzakonisht shqetësuese dhe natyrisht shkaktarët janë individualë dhe të përgjithshëm. Mirëpo ndër shkaktarët që mund të theksojmë te vetëvrasjet në Kosovë janë pa dyshim edhe pasojat që vijnë si rezultat i luftës së fundit, i shkallës së lartë të depresionit dhe faktor të tjerë socio-ekonomikë, të cilët ndikojnë jashtëzakonisht shumë, si gjendja sociale, papunësia, e cila shpeshherë nga njerëzit me kushtet që u ofrohen në realitetin kosovar nuk mund ta përballojnë këtë”, ka theksuar Ibrahimi.
