Vrasja në Pakashticë, viktima dhe i dyshuari për vrasje ishin baxhanakë mes vete
Një vrasje ka ndodhur dje në fshatin Pakashticë të komunës së Podujevës. I vrarë ka mbetur një 30-vjeçar me inicialet M.K., derisa si i dyshuar për vrasje është arrestuar një 34-vjeçar me inicialet F.B.
Sipas raportimeve të mediave, viktima dhe i dyshuari për vrasje ishin baxhanakë mes vete dhe se vrasja dyshohet se ka ndodhur aksidentalisht, derisa burrat po bënin gjueti në male.
Rastin e ka konfirmuar zëdhënësja e Policisë së Kosovës për rajonin e Prishtinës, Florie Ahmeti, e cila ka bërë me dije se në vendngjarje janë sekuestruar dy armë të gjuetisë.
“Sot rreth orës 16:00 kemi pranuar informatën për një rast të vrasjes, që ka ndodhur në fshatin Pakashticë të Podujevës. Lidhur me këtë rast në vendngjarje, policia ka arrestuar një person të dyshuar: F.B., mashkull 34 vjeç. Në vendngjarje janë sekuestruar: dy armë e gjuetisë. Viktimë në këtë rast është M.K. (mashkull), 30 vjeç, vdekjen e të cilit e ka konstatuar ekipi mjekësor në vendin e ngjarjes”, ka thënë Ahmeti, raporton Express.
Ahmeti ka thënë se hetuesit policorë janë duke punuar në koordinim me prokurorin për të ndriçuar dhe sqaruar të gjitha rrethanat që kanë të bëjnë me rastin.
Për rastin janë deklaruar edhe nga Prokuroria Themelore në Prishtinë. Zëdhënësja e kësaj prokurorie, Laureta Ulaj, ka thënë se aktualisht janë duke u ndërmarrë të gjitha veprimet e nevojshme hetimore për t’i sqaruar rrethanat e rastit.
“Ju njoftojmë se prokurorja kujdestare ka dalë në vendin e ngjarjes, ku ekipi mjekësor ka konstatuar vdekjen e një personi. Aktualisht janë duke u ndërmarrë të gjitha veprimet e nevojshme hetimore për t’i sqaruar rrethanat e rastit. Për zhvillimet e tjera do t’ju njoftojmë me kohë”, thuhet në njoftimin e Prokurorisë.
