Kosova do të mirëpres në vitin 2022 kampionatin botëror në hendboll për universitete

Kosova shumë herë deri më tani është dëshmuar si organizatore shumë e mirë e ngjarjeve të mëdha ndërkombëtare të hendbollit. Në vendin tonë është organizuar Kampionati i parë i IHF-së për vendet në zhvillim, në vitin 2015. Federata Ndërkombëtare i ka besuar edhe garën IHF Trophy për Evropë e më pas edhe fazën interkontinentale, e po ashtu FHK ka organizuar turne kualifikues për femra dhe ngjarje tjera. Ngjarje të rëndësishme në vendin tonë do të organizohen edhe në të ardhmen.

“Kosova do të mirëpres në vitin 2022 kampionatin botëror në hendboll për universitete”, ka njoftiar FHK.

Organizimi i këtij botërori të premten i është besuar Federatës së Sporteve Universitare të Kosovës. Bashkorganizator i kësaj ngjarje me rëndësi do të jetë Federata e Hendbollit të Kosovës. Federata jonë i ka dhënë letër përkrahëse Federatës së Sporteve Universitare, ndërsa do të jetë shumë e përfshirë në organizimin e kësaj ngjarje me peshë.

Është Komiteti Ekzekutiv i Federatës Ndërkombëtare të Sporteve Universitare (FISU) që ka vendosur që në Kosovë të organizohet Botërori i Universiteteve në hendboll në vitin 2022. FISU do të jetë në koordinim të plotë me IHF-në, njëjtë si dy federatat tona.

Kjo ngjarje e madhe universitare do t’i shërbejë promovimit të mëtejmë të hendbollit, që ka kohë që është stabilizuar si një prej sporteve kryesore në vend. Në Kosovë do të qëndrojnë delegacione nga e tërë bota, gjyqtarë e zyrtarë e po ashtu do të mbahen trajnime të ndryshme e organizime gjatë kohës së Botërorit.
“Është sukses i përbashkët. Do të bashkëpunojmë ngushtë me Federatën e Hendbollit të Kosovës. Do të jetë një ngjarje e madhe për zhvillimin e hendbollit dhe sportit në Kosovë, në veçanti e sportit universitar. Pres mbështetje nga të gjithë që t’i tregojmë botës se ne dimë dhe meritojmë këtë organizim, më të madhin deri më tani. Ta bëjmë Kosovën vend të sportit dhe të rinisë sonë të mrekullueshme”, ka theksuar Musa Selimi, kryetar i Federatës së Sporteve Universitare të Kosovës. Vitin e ardhshëm Botërorin e Universiteteve në hendboll e organizon qyteti polak Lodz. /Zëri.info.