“Zvicër 2025” Femrat: Shqipëria përballet me Norvegjinë në rundin e parë të play off-it
Shqipëria e vajzave do të përballet me ekipin e Norvegjisë në rundin e parë të play off-it e vlefshme për kampionatin evropian për vajza “Zvicër 2025”.
Në shortin e hedhur ditën e sotme në selinë e UEFA-s në Nyon të Zvicrës, goglat e vunë ekipin kuqezi përballë skuadrës së Norvegjisë, teksa Kombëtarja e vajzave njohu edhe rivalen e mundshme për në raundin e dytë të play off-it.
Në rast se Shqipëria kalon me sukses ekipin e Norvegjisë, në raundin e dytë të play off-it do të përballet me fituesen e çiftit Kroaci – Irlandë e Veriut.
Ndeshjet e raundit të parë të play off-it do të luhen me sistem vajtje – ardhje në periudhën 23-29 tetor 2024.
Shqipëria e vajzave avancoi në raundin e parë të play off-it pas suksesit të merituar në ndeshjet kualifikuese, ku vajzat kuqezi dominuan në grupin C5. Nën drejtimin e trajnerit Armir Grima, kuqezezat regjistruan tri fitore dhe një humbje, duke e mbyllur në vendin e parë në grupin C5 me 9 pikë në total. Falë këtij suksesi përfaqësuesja shqiptare e vajzave siguroi edhe ngjitjen për në Ligën B në edicionin e radhës të UEFA Nations League.
