DnV: Proces i rregullt i votimit dhe respektim i kënaqshëm i masave anti-COVID

Sipas raportimeve të vëzhguesve të Demokracisë në Veprim (DnV), procesi i votimit deri në mesditë po shoqërohet me pjesëmarrje të ulët të qytetarëve në votim, me përjashtim të komunave në veri të vendit, ku mesatarja e daljes është 3 herë më e lartë, krahasuar me komunat e tjera.

Deri më tani është raportuar për nivel të kënaqshëm të respektimit të masave anti-COVID nga ana e komisionarëve (73%) dhe qytetarëve që po frekuentojnë qendrat e votimit (71%).

Vështirësitë në gjetjen e emrit në listën e votuesve janë të shprehura edhe në këto zgjedhje. Deri në këtë kohë, në më shumë se 1/3-tën e vendvotimeve në nivel vendi është raportuar për 1 deri në 10 raste kur qytetarët nuk e kanë gjetur emrin në listën e votuesve.

Edhe sa i përket votimit me asistencë, ky fenomen është hasur në rreth 73% të vendvotimeve, por numri i rasteve sillet brenda trendëve normalë (1-10 raste). Deri më tani është raportuar raste të asistencës së palejuar.

Vëzhguesit nuk kanë raportuar për raste të ushtrimit të presionit te votuesit dhe nuk kanë evidentuar prani të zyrtarë të lartë politikë në qendra të votimit.

Vlen të përmendet që edhe ky proces po karakterizohet nga mbulueshmëri të lartë mediale.