Ilir Deda reagon ndaj Milaim Zekës: Po spekulon
Milaim Zeka nga Nisma për Kosovën ka thënë se koalicioni PDK-AAK-Nisma i ka votat e nevojshme për ta bërë qeverinë e re të vendit.
“Ramush Haradinaj, në bazë të informacionit unë që e kam, i ka votat, i ka numrat”, ka thënë Zeka në RTV Dukagjini.
Sipas tij, PAN, që do t’i ketë 39 deputetë në Kuvendin e ri, duke llogaritur në votat e 15 deputetëve nga partitë e tjera për formimin e qeverisë së re.
“Katër deputetë të Behgjet Pacollit; plus dy Mimoza Kusari dhe Ilir Deda, a po bëjnë gjashtë; edhe nja 10 i merr prej LDK-së dhe bëhet Qeveria”, është shprehur ai.
Deda, në një prononcim për ‘arbresh’ ka thënë se deklaratat e Milaim Zekës se dy deputetë të kësaj partie do ta votojnë Ramush Haradinajn për kryeministër janë spekulime.
“Qëndrimet e Alternativës janë të njohura dhe janë publike. Spekulimet e ndryshme nuk i komentojmë, sidomos këto nuk kanë të bëjnë fare me realitetin”, ka thënë Deda.
