Shënohet incidenti i parë gjatë transportimit të kutive me vota! (FOTO+VIDEO)
Shënohet incidenti i parë gjatë transportimit të materialeve zgjedhore për në qendrat e numërimit të votave.
Përfaqësues të Lëvizjes Socialiste për integrim, kanë bllokuar automjetin që transportonte kutitë me votat e qendrës numër 4409 në fshatin Bishan, pasi makina ka devijuar itinerarin duke u shpëtuar nga automjetet e shoqërimit të komisioneretë të LSI-së.
Makina me kutitë e votimit është bllokuar në zonën e spitalit rajonal në Vlorë, dhe përfasqësuesit e LSI-së kanë kërkuar ardhjen e policisë për të verifikuar situatën.
Kryesuesi i listës së LSI-së për qarkun e Vlorës Shezai Rrokaj, shoqëruar nga kreu i LSI-së për qytetin bregdetar, Vasil Bedinaj, dhe kandidati Mojsi Meminaj, i kanë kërkuar komisonerëve të mos lëvizin automjetin deri në mbërritjen e policisë.
Por edhe në prani të uniformave blu, mes dy forcave kundërshtare ka pasur përplasje fizike, pasi përfaqësuesit e PS-së, me në krye prefekten e Vlorës, Etjona Hoxha, kanë këmbëngulur të lëvizin automjetin. Nëse keni ankesa - ju drejtua Hoxha përfaqësuesve të LSI-së- mund t’i bëni pranë KZAZ-së.
Rrokaj ka kërkuar edhe prezencën e prokurorisë për të marr masat e procedurës penale sipas ligjit në rast të konstatimit të shkeljeve ligjore. /Express/