Koalicioni ‘PANA’ e shton numrin e ministrive

Qeveria e Kosovës shpeshë është krahasuar me Qeverinë e Kinës për nga numri i madh i ministrive.

Diferenca mes një shteti  të vogël e të varfër dhe një shteti supër të madh që po dominon tregun botëror, mund të ngushtohet të shtunën në rast se deputetët e Kuvendit të Kosovës e votojnë Ramush Haradinajn për kryeministër.

AktivPress mëson se liderët e partive që e përbëjnë koalicionin PANA kanë vendosur ta rrisin numrin e ministrive nga 19 sa ka qenë në kohën e Mustafës, në 20.

Këtu nuk përfshihen minisitrat pa portofol, të cilët në Qeverinë Mustafa kanë qenë dy.

Ministria e re që është shtuar është emërtuar si Ministria për Inovacion dhe Ndërmarrësi.

Kjo ministri, sipas marrëveshjes mes palëve, do të udhëhiqet nga PDK-ja.

Por shtimi i numrit të ministrive nuk është e vetmja risi në Qeverinë e mundshme Haradinaj.

Partnerët e koalicionit kanë vendosur t’i zgjerojnë fushat e veprimit të Minsitrisë së Diasporës.

Kjo ministri është planifikuar që në të ardhmën të quhet Minsitria e Diasporës dhe Investimeve Strategjike.

Fusha e investimeve strategjike në fakt  është e rregulluar me ligj të veçantë dhe ajo aktualisht hynë nën kupolën e Ministrisë së Tregtisë dhe Industrisë.

Liderët e partive politike, rëndom nëpër parafushata zgjedhore kanë premtuar se do ta zvogëlojnë numrin e madh të ministrive, por pas konsitituimit të insitucioneve të reja, kanë ndodhur e kundërta- ministritë janë shtuar.

Kështu ka ndodhur në të kaluarën- kështu po ndodhë edhe tani.