Ramosaj: Dy ministri po duan të na fusin në kurth

Kryetari i Komunës së Deçanit, Bashkim Ramosaj, duke komentuar një shkresë që u ka ardhur nga Ministria e Mjedisit dhe Planifikimit Hapësinor dhe Infrastrukturës në lidhje me hartimin e planin rregullues për komunat e shpallura me interes publik në parkun kombëtar “Bjeshkët e Nëmura”, ka thënë se në këtë plan është futur në lojë Ministria e Bujqësisë dhe Agjencioni për Pyje, që me ose pa dashje po fusin në kurth komunën që ai e drejton.

Ramosaj në mbledhjen e rregullt të Kuvendit Komuna ka thënë se këto ministri dhe agjenci po futen në një lloj konflikti administrativ, sepse nuk po e dinë se deri ku është e drejta ligjore.

“Vendosja e normave e ka interesin e qytetarëve të kësaj komune, në këtë pjesë të pyjeve… Në këtë rast është futur në lojë edhe Ministria e Bujqësisë dhe Agjencioni për Pyje, të cilët nuk po e kanë të qartë dhe kanë një farë konkluzioni të ligjeve dhe të normave mes vete, sepse nuk e dinë deri ku është mandati apo e drejta ligjore e Agjencionit të Parkut, Ministrisë së Mjedisit, të Bujqësisë dhe Agjencionit të Pyjeve, është një farë konflikti administrativ mes këtyre agjencive që dashje, pa dashje neve po na fusin në kurth”, shprehet Ramosaj.