Derisa neni 37, i cili trajton përgjegjësinë penale të kryeredaktorëve, botuesve, shtypshkronjave ose prodhuesve, është parë si më i lehtë për ndryshim, mendime krejtësisht të kundërta janë dhënë për nenin 38, i cli obligon gazetarët që t’i publikojnë burimet e tyre të informatave, nëse këtë e kërkon gjykata.

Për heqjen e këtyre dy neneve, rezerva të mëdha ka shprehur kryetari i Komisionit për Legjislaturë, Arben Gashi, i cili ka thënë se duhet të shikohen standardet ndërkombëtare se si parashihet çështja e medieve dhe gazetarëve në kodet e tyre penale.

“Rrezikojmë të krijojmë situata nga të cilat mund të dalim vështirë. Qëllimi është që të krijojmë kushte sa më të mira për punë për të gjithë qytetarët, edhe për prokurorinë që ka çështje të ndjekjeve penale që duhet të gjykojnë, e po ashtu edhe për shoqërinë civile dhe mediet”, ka thënë deputeti i LDK-së.

Kundër heqjes së nenit 38, është shprehur edhe prokurori special Besim Kelmendi, i cili ka thënë se ky nen duhet të miratohet si i tillë që është.

“Konsideroj se neni 38 ka ekzistuar edhe në kodin aktual të Kosovës, është neni 29 i kodit aktual. Deri më tani që nga aplikimi i këtij kodi nuk kemi pasur asnjë rast kur prokurorët apo gjyqtarët apo ndoshta në thonjëza dikush tjetër, ta ketë keqpërdorur këtë situatë dhe kjo është vetëm për situata specifike, jo për të gjitha veprat, jo për të gjitha rastet”, ka thënë ai.

Ndër më të ashprit kundër heqjes së neneve 37 e 38 është shprehur edhe deputeti tjetër i LDK-së, Armend Zemaj. “Unë nuk pajtohem që të hiqen tërësisht këto nene, ndërsa të modifikohen ne jemi pajtuar në grupin punues që të jetë një gjuhë e qartë e definimit të përgjegjësisë të personave juridikë, por edhe kryeredaktorëve, e botuesve”, ka thënë Zemaj.

Ndërkaq, heqjen e nenit 37 dhe ndryshimi i atij 38 është mbështetur nga Asociacioni i Gazetarëve Profesionistë të Kosovës (AGPK) dhe Rrjeti Ballkanik për Gazetari Hulumtuese (BIRN). Kryetari i AGPK-së, Arben Ahmeti, ka thënë se neni 37 duhet të hiqet ngase e pengon punën e medieve të lira, ndërsa neni tjetër duhet të ndryshohet, në mënyrë që zbulimi i burimit të kërkohet vetëm në rastet kur kemi të bëjmë me rrezikim të jetës së njeriut.

Ky mendim është mbështetur edhe nga përfaqësuesja e BIRN-it, Flutura Kusari, e cila ka thënë se neni 37 nuk duhet të jetë fare në Kodin e ardhshëm Penal, ndërsa ka theksuar se gazetarët duhet të japin burimin e informatave nëse me këtë rrezikohet jeta e një apo më shumë personave, por nuk duhet të kërkohet që kjo të ndodhë në rastet kur gazetarët duke u mbështetur në burime të tyre të informatave raportojë për korrupsion, shkelje të ligjit apo marrje të ryshfetit.

I pranishëm në këtë dëgjim publik ka qenë edhe ministri i Drejtësisë, Hajredin Kuçi, i cili ka thënë se pas shqetësimeve të komunitetit të medieve, ka kërkuar që dy nenet të hiqen nga drafti, e rrjedhimisht Kodi i ardhshëm Penal të mos i përmbajë ato.